ವಿಟ್ಲ (ವಿಶೇಷ ವರದಿ): “ಶಕ್ತಿ ಇದ್ದಾಗ ಜೊತೆಗಿರುವ ಜಗತ್ತು, ದೇಹ ತಣ್ಣಗಾದಾಗ ತಿರುಗಿಯೂ ನೋಡಲ್ಲ…” – ಇದು ಇಂದಿನ ಬದ್ಧತೆಯಿಲ್ಲದ ಸ್ವಾರ್ಥ ಸಮಾಜದ ಕಹಿ ವಾಸ್ತವ. ಆದರೆ, ಬಂಟ್ವಾಳ ತಾಲೂಕಿನ ಕೊಳ್ನಾಡು ಗ್ರಾಮದ ಸಾಲೆತ್ತೂರಿನಲ್ಲಿ ಶ್ರೀಕೃಷ್ಣ ಜನ್ಮಾಷ್ಟಮಿಯ ದಿನದಂದೇ ನಡೆದ ಅಪರೂಪದ ಮಾನವೀಯ ಘಟನೆಯೊಂದು ಸಮಾಜಕ್ಕೆ ಆಶಾದಾಯಕ ಬೆಳಕಾಗಿ ಮೂಡಿಬಂದಿದೆ. ಅನಾಥರಂತೆ ಮರಣದಂಚಿನಲ್ಲಿ ಬಿದ್ದಿದ್ದ ವೃದ್ಧರೊಬ್ಬರನ್ನು ರಕ್ಷಿಸಿ, ಶುಚಿಗೊಳಿಸಿ, ಚಿಕಿತ್ಸೆಗೆ ದಾಖಲಿಸುವ ಮೂಲಕ ಸ್ಥಳೀಯ ಯುವಕರ ತಂಡವೊಂದು ನಿಜವಾದ ‘ಮಾಧವ ಸೇವೆ’ಯನ್ನು ಮಾಡಿ ಸಾರ್ಥಕತೆ ಮೆರೆದಿದೆ.

ಸಂಸಾರ, ಧರ್ಮ, ಜಾತಿ ಎಲ್ಲವೂ ಇದ್ದರೂ ನೆರಳಿಲ್ಲದ ಜೀವನ!

ಸಾಲೆತ್ತೂರು ಪಾಲ್ತಾಜೆ ನಿವಾಸಿಯಾಗಿರುವ ಆನಂದ ಪೂಜಾರಿ (62) ಅವರು ಸ್ಥಳೀಯರಲ್ಲಿ ‘ನಕ್ಕೀರನ್’ ಎಂದೇ ಚಿರಪರಿಚಿತರು. ಪತ್ನಿ, ಪುತ್ರ, ಪುತ್ರಿ, ಬಂಧು-ಬಳಗ ಹಾಗೂ ಸಮುದಾಯ – ಹೀಗೆ ಎಲ್ಲವೂ ಇದ್ದರೂ ವಿಧಿಯಾಟಕ್ಕೆ ಸಿಲುಕಿ ಅವರೆಲ್ಲರಿಂದಲೂ ದೂರವಾಗಿದ್ದರು. ಊರಿನ ಬಸ್ ತಂಗುದಾಣ, ಅಂಗಡಿಗಳ ಜಗುಲಿ ಹಾಗೂ ಸಮಾಜ ಮಂದಿರದ ಕೋಣೆಗಳೇ ಇವರಿಗೆ ಆಸರೆಯಾಗಿದ್ದವು. ಪರಿಚಿತರು ನೀಡುತ್ತಿದ್ದ ಸಣ್ಣಪುಟ್ಟ ಕೆಲಸಗಳನ್ನು ಮಾಡಿ, ಸಿಕ್ಕ ಹಣದಲ್ಲಿ ದಿನ ದೂಡುತ್ತಿದ್ದ ಇವರ ಜೀವನ ಸಂಪೂರ್ಣವಾಗಿ ಹಾದಿತಪ್ಪಿತ್ತು.

ಕತ್ತಲ ಕೋಣೆಯಲ್ಲಿ ಮರಣದಂಚಿನಲ್ಲಿದ್ದ ‘ನಕ್ಕೀರನ್’

ಕಳೆದ ಐದು ದಿನಗಳಿಂದ ಸಾಲೆತ್ತೂರು ಮೈದಾನದ ಬಳಿಯ ಸಮಾಜ ಮಂದಿರದ ಕತ್ತಲ ಕೋಣೆಯಲ್ಲಿ, ದುರ್ನಾತ ಬೀರುವ ತ್ಯಾಜ್ಯಗಳ ರಾಶಿಯ ನಡುವೆ ನಕ್ಕೀರನ್ ಅವರು ಅಸಹಾಯಕರಾಗಿ ಬಿದ್ದುಕೊಂಡಿದ್ದರು. ತೀವ್ರ ಅನಾರೋಗ್ಯದಿಂದ ಎದ್ದು ನಿಲ್ಲಲೂ ಆಗದೆ, ಮಲ-ಮೂತ್ರ ವಿಸರ್ಜನೆ ಹಾಗೂ ವಾಂತಿಯ ನಡುವೆಯೇ ಅಸ್ಥಿಪಂಜರದಂತಾಗಿದ್ದರು. ಅವರ ಉಸಿರು ಯಾವುದೇ ಕ್ಷಣದಲ್ಲಿ ನಿಲ್ಲುವ ಹಂತಕ್ಕೆ ತಲುಪಿತ್ತು.

ವಾಲಿಬಾಲ್ ಆಟ ಬದಿಗೊತ್ತಿ ‘ಮಾಧವ ಸೇವೆ’ಗಿಳಿದ ಯುವಕರು

ಸಾರ್ವಜನಿಕರಿಂದ ಬಂದ ಮಾಹಿತಿಯಂತೆ ಸ್ಥಳಕ್ಕೆ ಆಗಮಿಸಿದ ಹಿರಿಯ ಪತ್ರಕರ್ತ ದೀವಟಿಗೆ ಡಿಜಿಟಲ್‌ ಮೀಡಿಯಾದ ಸಂಪಾದಕ ವಿ. ಟಿ. ಪ್ರಸಾದ್ ಅವರು ಪರಿಸ್ಥಿತಿಯ ಗಂಭೀರತೆಯನ್ನು ಪರಿಶೀಲಿಸಿದರು. ತಕ್ಷಣವೇ ಅವರು ಸ್ಥಳೀಯ ಯುವಕರಾದ ರಮೇಶ್ ನಂದರಬೈಲು, ಸುಕೇಶ್ ಬರಿಮಾರು, ಜಯಂತ್, ಕಾರ್ತಿಕ್, ಹರೀಶ್ ಕಲ್ಲಮಜಲು ಹಾಗೂ ‘ಜಯಂತ್ ಲೈಟಿಂಗ್ಸ್’ ತಂಡದವರೊಂದಿಗೆ ಮಾತುಕತೆ ನಡೆಸಿದರು.

ವಿಶೇಷವೆಂದರೆ, ಅದೇ ಸಮಯದಲ್ಲಿ ಪಕ್ಕದಲ್ಲೇ ಶ್ರೀಕೃಷ್ಣ ಜನ್ಮಾಷ್ಟಮಿಯ ಅಂಗವಾಗಿ ಅದ್ಧೂರಿ ವಾಲಿಬಾಲ್ ಪಂದ್ಯಾಟ ನಡೆಯುತ್ತಿತ್ತು. ಆದರೆ, ಆ ಸಂಭ್ರಮ-ಆಟವನ್ನು ಬದಿಗೊತ್ತಿದ ಈ ಯುವಕರ ಪಡೆ, ನಕ್ಕೀರನ್ ಅವರ ಜೀವ ರಕ್ಷಣೆಯಲ್ಲಿಯೇ ಶ್ರೀಕೃಷ್ಣನ ಸಾಕ್ಷಾತ್ಕಾರ ಕಂಡುಕೊಂಡರು.

ಪ್ರಾಥಮಿಕ ಶುಚಿತ್ವ ಮತ್ತು ಆಸ್ಪತ್ರೆಗೆ ದಾಖಲು

ಕತ್ತಲ ಕೋಣೆಯಿಂದ ಅವರನ್ನು ಹೊರಗೆ ತಂದ ಯುವಕರು, ಬಕೆಟ್ ಹಾಗೂ ಪೈಪ್ ನೀರು ಹಾಕಿ ಸಂಪೂರ್ಣ ದೇಹವನ್ನು ಶುಚಿಗೊಳಿಸಿದರು. ಶಾಂಪೂ, ಸೋಪು ಹಚ್ಚಿ ಕಷ್ಟಪಟ್ಟು ತೊಳೆಯುವುದರ ಜೊತೆಗೆ, ಅವರ ತಲೆಗೂದಲು, ಮೀಸೆ ಹಾಗೂ ಗಡ್ಡವನ್ನು ಬೋಳಿಸಿ (ಶೇವ್ ಮಾಡಿ) ನೈರ್ಮಲ್ಯಗೊಳಿಸಿದರು. ನಂತರ ಹೊಸ ಬಟ್ಟೆಗಳನ್ನು ತೊಡಿಸಿ ನವಜೀವನದ ಸ್ಪರ್ಶ ನೀಡಿದರು.

ಬಳಿಕ ಸಾಲೆತ್ತೂರು ಗಣೇಶೋತ್ಸವ ಸಮಿತಿಯ ಅಂಬ್ಯುಲೆನ್ಸ್ ಹಾಗೂ ಫ್ರೆಂಡ್ಸ್ ವಿಟ್ಲ ಮುರಳೀಧರ ತಂಡದ ಸಕ್ರಿಯ ಸಹಕಾರದೊಂದಿಗೆ ಅವರನ್ನು ವಿಟ್ಲ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಯಿತು. ಸದ್ಯ ವೈದ್ಯರ ತಂಡ ಅವರಿಗೆ ತುರ್ತು ಚಿಕಿತ್ಸೆ ಒದಗಿಸುತ್ತಿದೆ.

ನಾಡು ಮೆಚ್ಚಿದ ಮಾನವೀಯತೆ!

ಕಷ್ಟದಲ್ಲಿದ್ದ ಜೀವಕ್ಕೆ ಆಸರೆಯಾಗಿ ನಿಂತು, ಸ್ವಚ್ಛತೆ ಮತ್ತು ನೈಜ ಕಾಳಜಿಯ ಮೂಲಕ ಮರುಜನ್ಮ ನೀಡಿದ ಸಾಲೆತ್ತೂರಿನ ಈ ಯುವಕರ ಕಾರ್ಯಕ್ಕೆ ಸಾರ್ವಜನಿಕ ವಲಯದಲ್ಲಿ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆ ಮತ್ತು ಪ್ರಶಂಸೆ ವ್ಯಕ್ತವಾಗಿದೆ. ನಕ್ಕೀರನ್ ಆನಂದ ಪೂಜಾರಿ ಅವರು ಶೀಘ್ರ ಗುಣಮುಖರಾಗಲಿ ಎಂದು ಊರಿನ ಸಮಸ್ತ ನಾಗರಿಕರು ಹಾರೈಸಿದ್ದಾರೆ

ಪುತ್ತೂರು: ಕುಲಾಲ ಸಮಾಜ ರತ್ನ, ನಿವೃತ್ತ ತಹಶೀಲ್ದಾರ್, ಸಹಕಾರಿ ಭೀಷ್ಮ ಹಾಗೂ ಪುತ್ತೂರಿನ ಕುಂಬಾರರ ಗುಡಿ ಕೈಗಾರಿಕಾ ಸಹಕಾರ ಸಂಘದ (ನಿ.) ಮಾಜಿ ಅಧ್ಯಕ್ಷರು, ಹಾಲಿ ನಿರ್ದೇಶಕರಾಗಿದ್ದ ಶತಾಯುಷಿ ಬಿ.ಎಸ್. ಕುಲಾಲ್ (100) ಅವರು ಆ. 30ರಂದು ನಿಧನರಾದರು.

ಕಂದಾಯ ಇಲಾಖೆಯಲ್ಲಿ ತಹಶೀಲ್ದಾರ್ ಆಗಿ ದೀರ್ಘಕಾಲ ದಕ್ಷ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದ ಬಿ.ಎಸ್. ಕುಲಾಲ್ ಅವರು, ಸಹಕಾರ ಹಾಗೂ ಸಾರ್ವಜನಿಕ ಕ್ಷೇತ್ರಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದರು. ಪುತ್ತೂರಿನ ಕುಂಬಾರರ ಗುಡಿ ಕೈಗಾರಿಕಾ ಸಹಕಾರ ಸಂಘದ ಅಧ್ಯಕ್ಷರಾಗಿ ಹಾಗೂ ನಿರ್ದೇಶಕರಾಗಿ ಸಂಸ್ಥೆಯ ಬೆಳವಣಿಗೆಗೆ ಗಣನೀಯ ಕೊಡುಗೆ ನೀಡಿದ್ದರು.

ಇಂದು ಸಂಜೆ ಅಂತ್ಯಕ್ರಿಯೆ: ಮೃತರ ಭೌತಿಕ ಶರೀರದ ಅಂತಿಮ ಸಾರ್ವಜನಿಕ ದರ್ಶನಕ್ಕೆ ಆ. 30ರಂದು ಮಧ್ಯಾಹ್ನ ನಂತರ ಪುತ್ತೂರು ಕುಂಬಾರರ ಗುಡಿ ಕೈಗಾರಿಕಾ ಸಹಕಾರ ಸಂಘದ ಆವರಣದಲ್ಲಿ ವ್ಯವಸ್ಥೆ ಮಾಡಲಾಗಿದೆ. ಸಾರ್ವಜನಿಕ ದರ್ಶನದ ಬಳಿಕ ಸಂಜೆ ಪುತ್ತೂರು ಸ್ಮಶಾನದಲ್ಲಿ ಅಂತ್ಯಕ್ರಿಯೆ ನೆರವೇರಲಿದೆ ಎಂದು ಸಹಕಾರ ಸಂಘದ ಅಧ್ಯಕ್ಷ ಭಾಸ್ಕ‌ರ್ ಪೆರುವಾಯಿ ತಿಳಿಸಿದ್ದಾರೆ.

ಮೃತರು ಇಬ್ಬರು ಪುತ್ರರು, ಓರ್ವ ಪುತ್ರಿ, ಸೊಸೆ, ಅಳಿಯಂದಿರು ಹಾಗೂ ಮೊಮ್ಮಕ್ಕಳು ಸೇರಿದಂತೆ ಅಪಾರ ಬಂಧು-ಮಿತ್ರರನ್ನು ಅಗಲಿದ್ದಾರೆ. ಬಿ.ಎಸ್. ಕುಲಾಲ್ ಅವರ ನಿಧನಕ್ಕೆ ಸಹಕಾರ ಹಾಗೂ ವಿವಿಧ ಕ್ಷೇತ್ರಗಳ ಗಣ್ಯರು ತೀವ್ರ ಕಂಬನಿ ಮಿಡಿದಿದ್ದಾರೆ.

ಪುತ್ತೂರು: ದಕ್ಷಿಣ ಕನ್ನಡ ಜಿಲ್ಲಾ ಮುಸ್ಲಿಂ ಯುವಜನ ಪರಿಷತ್ (ರಿ.), ಪುತ್ತೂರು ತಾಲೂಕು ಘಟಕದ ಆಶ್ರಯದಲ್ಲಿ ಲೋಕನಾಯಕ ಪ್ರವಾದಿ ಮುಹಮ್ಮದ್ ಮುಸ್ತಫಾ (ಸ.ಅ) ಅವರ 1501ನೇ ವರ್ಷದ ಜನ್ಮದಿನಾಚರಣೆಯ ಅಂಗವಾಗಿ 2026–2027ನೇ ಸಾಲಿನ ‘ಪುತ್ತೂರು ತಾಲೂಕು ಈದ್ ಮಿಲಾದ್ ಸಮಿತಿ’ಯನ್ನು ನೂತನವಾಗಿ ರಚಿಸಲಾಗಿದೆ.

ನೂತನ ಸಮಿತಿಯ ಅಧ್ಯಕ್ಷರಾಗಿ ದ.ಕ. ಜಿಲ್ಲಾ ಐಕ್ಯ ವೇದಿಕೆಯ ಅಧ್ಯಕ್ಷ ಹನೀಫ್ ಬಗ್ಗುಮೂಲೆ ಅವರು ಸರ್ವಾನುಮತದಿಂದ ಆಯ್ಕೆಯಾಗಿದ್ದಾರೆ.

ನೂತನ ಪದಾಧಿಕಾರಿಗಳ ವಿವರ:

• ಅಧ್ಯಕ್ಷರು: ಹನೀಫ್ ಬಗ್ಗುಮೂಲೆ
• ಉಪಾಧ್ಯಕ್ಷರು: ಮೂಸಾ ಕರೀಂ ಮಾಣಿ
• ಪ್ರಧಾನ ಕಾರ್ಯದರ್ಶಿ: ನೌಷಾದ್ ಹಾಜಿ ಬೋಳ್ವಾರ್
• ಜೊತೆ ಕಾರ್ಯದರ್ಶಿಗಳು: ಶರೀಫ್ ಬಲ್ನಾಡ್ ಹಾಗೂ ಬಾತಿಷಾ ಬಡಕ್ಕೋಡಿ
• ಸಂಘಟನಾ ಕಾರ್ಯದರ್ಶಿಗಳು: ಅಶ್ರಫ್ ಕೆ.ಜಿ.ಎನ್., ಹಮೀದ್ ಮೌಲಾ, ಸಿದ್ದೀಕ್ ಬೀಟಿಗೆ ಹಾಗೂ ಹಂಝ ಕಬಕ
• ಕೋಶಾಧಿಕಾರಿ: ಸಿದ್ದೀಕ್ ಸೂರ್ಯ
• ಪತ್ರಿಕಾ ಕಾರ್ಯದರ್ಶಿ: ಇಫಾಝ್ ಬನ್ನೂರು

ಪದಾಧಿಕಾರಿಗಳ ಜೊತೆಗೆ ಕಾರ್ಯಕಾರಿ ಸಮಿತಿಗೆ ವಿವಿಧ ಜವಾಬ್ದಾರಿಗಳಿಗಾಗಿ 33 ಮಂದಿ ಸದಸ್ಯರನ್ನು ಆಯ್ಕೆ ಮಾಡಲಾಗಿದೆ.

ಬೃಹತ್ ಮಿಲಾದ್ ಜಾಥಾ ಹಾಗೂ ಸಮಾವೇಶ

ಸಭೆಯಲ್ಲಿ ಮುಂಬರುವ ಈದ್ ಮಿಲಾದ್ ಕಾರ್ಯಕ್ರಮಗಳನ್ನು ಯಶಸ್ವಿಯಾಗಿ, ಶಾಂತಿಯುತವಾಗಿ ಹಾಗೂ ಅರ್ಥಪೂರ್ಣವಾಗಿ ಆಯೋಜಿಸಲು ತೀರ್ಮಾನಿಸಲಾಯಿತು.

ಮಿಲಾದ್ ಜಾಥಾ: ವರ್ಷಪ್ರತಿಯಂತೆ ಈ ಬಾರಿಯೂ ದರ್ಬೆ ಸರ್ಕಲ್‌ನಿಂದ ಕಿಲ್ಲೆ ಮೈದಾನದವರೆಗೆ ಬೃಹತ್ ಮಿಲಾದ್ ಕಾಲ್ನಡಿಗೆ ಜಾಥಾ ನಡೆಯಲಿದೆ.

ಸಾಂಸ್ಕೃತಿಕ ಪ್ರದರ್ಶನ: ಜಾಥಾದಲ್ಲಿ ವಿವಿಧ ದಫ್ ಪ್ರದರ್ಶನ, ಸ್ಕೌಟ್ ಪ್ರದರ್ಶನ ಹಾಗೂ ಇಸ್ಲಾಮಿಕ್ ಸಾಂಸ್ಕೃತಿಕ ಕಲೆಗಳನ್ನು ಬಿಂಬಿಸುವ ವೈವಿಧ್ಯಮಯ ಪ್ರದರ್ಶನಗಳು ಕಂಗೊಳಿಸಲಿವೆ.

ಸಮಾವೇಶ: ಜಾಥಾದ ಮುಕ್ತಾಯದ ನಂತರ ಕಿಲ್ಲೆ ಮೈದಾನದಲ್ಲಿ ಬೃಹತ್ ಮಿಲಾದ್ ಸಮಾವೇಶವನ್ನು ಆಯೋಜಿಸಲು ನಿರ್ಧರಿಸಲಾಗಿದೆ.

ದ.ಕ. ಜಿಲ್ಲಾ ಮುಸ್ಲಿಂ ಯುವಜನ ಪರಿಷತ್ತಿನ ತಾಲೂಕು ಅಧ್ಯಕ್ಷ ಅಶ್ರಫ್ ಕಲ್ಲೇಗ ಹಾಗೂ ರಾಜ್ಯ ಸಂಚಾಲಕ ನ್ಯಾಯವಾದಿ ಎಂ.ಪಿ. ಅಬೂಬಕ್ಕರ್ ಹಾಜಿ ಅವರ ಉಪಸ್ಥಿತಿಯಲ್ಲಿ ನೂತನ ಪದಾಧಿಕಾರಿಗಳ ಆಯ್ಕೆ ಮತ್ತು ಕಾರ್ಯಕ್ರಮದ ರೂಪುರೇಷೆಗಳ ಬಗ್ಗೆ ಚರ್ಚಿಸಲಾಯಿತು. ತಾಲೂಕು ಮುಸ್ಲಿಂ ಯುವಜನ ಪರಿಷತ್ ಸಂಚಾಲಕರಾದ ನ್ಯಾಯವಾದಿ ನೋಟರಿ ನೂರುದ್ದೀನ್ ಸಾಲ್ಮರ ಹಾಗೂ ಕಾಸಿಂ ಹಾಜಿ ಮಿತ್ತೂರು ಆಯ್ಕೆ ಪ್ರಕ್ರಿಯೆಯನ್ನು ನಡೆಸಿಕೊಟ್ಟರು.