ಅರಂತೋಡು: ಕಾಡಿನ ಅಪ್ಪುಗೆಯಿಂದ ಜಗತ್ತನ್ನು ಕಾಣಲು ಬಂದ ಕಂದನೊಮ್ಮನ ಜೀವ ದಾರಿಯಲ್ಲೇ ಕರಗಿಹೋಗಿದೆ! ತೊಡಿಕಾನ ಗ್ರಾಮದ ಹರ್ಲಡ್ಕದ ಚಂದ್ರಶೇಖರ್ ಎಂಬುವವರ ತೋಟದಲ್ಲಿ ಸುಮಾರು ಒಂದು ವರ್ಷ ಪ್ರಾಯದ ಮುದ್ದು ಆನೆ ಮರಿಯೊಂದು ಅಸುನೀಗಿರುವ ಹೃದಯ ವಿದ್ರಾವಕ ಘಟನೆ ವರದಿಯಾಗಿದೆ.

ಭಾಗಮಂಡಲದ ಮೀಸಲು ಅರಣ್ಯದಿಂದ ತನ್ನ ಅಮ್ಮ ಹಾಗೂ ಮಂದೆಯೊಂದಿಗೆ ಆಹಾರ ಅರಸಿ ಹೊರಟ ಆನೆಗಳ ಹಿಂಡು, ಹರ್ಲಡ್ಕದ ತೋಟಕ್ಕೆ ನುಗ್ಗಿ ಕಾಫಿ ಹಾಗೂ ಬಾಳೆ ಕೃಷಿಗೆ ಹಾನಿ ಉಂಟುಮಾಡಿತ್ತು. ಆದರೆ, ಯಾರೂ ಊಹಿಸದ ದುರಂತವೊಂದು ಅಲ್ಲಿ ಸಂಭವಿಸಿದೆ.

ತೋಟವು ಅತ್ಯಂತ ಎತ್ತರ ಪ್ರದೇಶದಲ್ಲಿದ್ದು, ಕಾಡಿನತ್ತ ಮರಳಿ ತೆರಳುವ ಆತುರದಲ್ಲಿ ಮುದ್ದು ಆನೆಮರಿಯು ಆಯತಪ್ಪಿ ಕೆಳಗೆ ಜಾರಿ ಬಿದ್ದಿದೆ. ಈ ವೇಳೆ ಹಿಂದೆ ಬರುತ್ತಿದ್ದ ಬೃಹತ್ ಆನೆಗಳ ಕಾಲ್ತುಳಿತಕ್ಕೆ ಸಿಲುಕಿ ಆ ಕಂದಮರಿ ಸ್ಥಳದಲ್ಲೇ ಪ್ರಾಣಬಿಟ್ಟಿದೆ ಎಂದು ಶಂಕಿಸಲಾಗಿದೆ.

ಕಾಡಿನ ಸುರಕ್ಷಿತ ಮಡಿಲನ್ನು ಬಿಟ್ಟು ನಾಡಿನ ಕೃಷಿಭೂಮಿಗೆ ಬಂದ ಆನೆಗಳ ಹಿಂಡಿಗೆ, ಈ ಕಂದನ ಅಗಲಿಕೆ ತಂದ ನೋವು ಅಷ್ಟಿಷ್ಟಲ್ಲ. ಕಾಡಿನ ಮಕ್ಕಳ ಈ ಅನಿರೀಕ್ಷಿತ ಸಾವು ಸ್ಥಳೀಯರಲ್ಲಿ ಆತಂಕದ ಜೊತೆಗೆ ಮರುಕ ಹುಟ್ಟುಹಾಕಿದೆ. ಮುಗ್ದ ಆನೆಮರಿಯ ಸಾವಿಗೆ ನಿಖರವಾದ ಕಾರಣವೇನು ಎಂಬುದು ಅರಣ್ಯ ಇಲಾಖೆಯ ತನಿಖೆಯಿಂದಷ್ಟೇ ಹೊರಬರಬೇಕಿದೆ.

ಮೂಕ ಪ್ರಾಣಿಯೊಂದರ ಈ ಅಕಾಲಿಕ ಮರಣ ಪ್ರತಿಯೊಬ್ಬರ ಎದೆಯಲ್ಲಿ ಕಣ್ಣೀರು ತರಿಸಿದೆ.

ಬೆಳ್ತಂಗಡಿ: ವನ್ಯಜೀವಿ ಅರಣ್ಯ ಇಲಾಖಾ ವಿಭಾಗಕ್ಕೆ ಸೇರಿದ ಕುದುರೆಮುಖ ರಾಷ್ಟ್ರೀಯ ಉದ್ಯಾನವನದ ವ್ಯಾಪ್ತಿಯ ಅರಣ್ಯದಲ್ಲಿ ಅಕ್ರಮವಾಗಿ ಮರ ಕಡಿದು ದಾಸ್ತಾನು ಮಾಡಿದ್ದ ಪ್ರಕರಣವನ್ನು ಬೆಳ್ತಂಗಡಿ ವಲಯ ವನ್ಯಜೀವಿ ಅರಣ್ಯ ಇಲಾಖೆ ಅಧಿಕಾರಿಗಳು ಪತ್ತೆ ಹಚ್ಚಿದ್ದಾರೆ.

ಬೆಳ್ತಂಗಡಿ ತಾಲೂಕಿನ ನಾವೂರು ಗ್ರಾಮದ ಬಾಲ್ಲರ ಎಂಬಲ್ಲಿ ವನ್ಯಜೀವಿ ಅರಣ್ಯಕ್ಕೆ ಸೇರಿದ ಮೀಸಲು ಅರಣ್ಯದೊಳಗೆ ಅಕ್ರಮ ಪ್ರವೇಶ ಮಾಡಿ ಹಲಸಿನ ಮರಗಳನ್ನು ಕಡಿಯುತ್ತಿರುವ ಬಗ್ಗೆ ಖಚಿತ ಮಾಹಿತಿ ಪಡೆದ ಬೆಳ್ತಂಗಡಿ ವಲಯದ ಅರಣ್ಯಾಧಿಕಾರಿ ಶರ್ಮಿಷ್ಠಾ ನೇತೃತ್ವದ ತಂಡ ಅ.13 ರಂದು ದಾಳಿ ನಡೆಸಿದೆ.

ದಾಳಿ ವೇಳೆ ಸ್ಥಳದಲ್ಲಿ 6 ಹಲಸಿನ ಮರದ ತುಂಡುಗಳು ಮತ್ತು ಒಂದು ಹಲಸಿನ ಮರದ ದಿಮ್ಮಿಯನ್ನು ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.

ಬಳಿಕ ಬೆಳ್ತಂಗಡಿ ನ್ಯಾಯಾಲಯದ ಅನುಮತಿ ಪಡೆದು ಅ.14 ರಂದು ವನ್ಯಜೀವಿ ಸಂರಕ್ಷಣಾ ಕಾಯ್ದೆ ಸೆಕ್ಷನ್ 27, 29, 35, 50, 51, 55 ರ ಅಡಿಯಲ್ಲಿ ಬೆಳ್ತಂಗಡಿ ತಾಲೂಕಿನ ನಾವೂರು ಗ್ರಾಮದ ಮೊರ್ತಾಜೆ ನಿವಾಸಿ, VHP ಮತ್ತು ಬಿಜೆಪಿ ಪಕ್ಷದ ಮುಖಂಡ ಪ್ರಮೋದ್ ಸಾಲ್ಯಾನ್ ಮೊರ್ತಾಜೆ ಎಂಬಾತನ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಮುಂದಿನ ತನಿಖೆಯನ್ನು ಎಸಿಎಫ್ ಅವರು ನಡೆಸಲಿದ್ದಾರೆ.

ಹಿಂದೆಯೂ ಗೋಕಳ್ಳತನ ಪ್ರಕರಣದಲ್ಲಿ ಬಂಧನ:

ಆರೋಪಿ ಪ್ರಮೋದ್ ಸಾಲ್ಯಾನ್ ಈ ಹಿಂದೆ ವಿಶ್ವ ಹಿಂದೂ ಪರಿಷತ್ ನಾವೂರು ಗ್ರಾಮದ ಅಧ್ಯಕ್ಷನಾಗಿದ್ದು, ಅಕ್ರಮ ಗೋಕಳ್ಳತನ ದಂಧೆಯಲ್ಲಿ ತೊಡಗಿದ್ದ ಎಂದು ಹೇಳಲಾಗುತ್ತಿದೆ. ಈ ಹಿಂದೆ ಸ್ವಂತ ಪಿಕಪ್ ವಾಹನದಲ್ಲಿ ಅಕ್ರಮವಾಗಿ ಗೋ ಸಾಗಾಟ ಮಾಡುವಾಗ ಬಂಧಿತನಾಗಿ ಜೈಲು ಸೇರಿದ್ದ. ಜೈಲಿನಿಂದ ಬಂದ ಮೇಲೂ ಅದೇ ದಂಧೆ ಮುಂದುವರಿಸಿದ್ದ ಎನ್ನಲಾಗಿದೆ.

ಇದೀಗ ಗೋಕಳ್ಳತನದ ನಡುವೆಯೇ ಅಕ್ರಮ ಮರ ಕಳ್ಳತನ ಮಾಡಿ ವನ್ಯಜೀವಿ ಅರಣ್ಯ ಇಲಾಖೆ ಅಧಿಕಾರಿಗಳ ಕೈಗೆ ಸಿಕ್ಕಿ ಬಿದ್ದಿದ್ದಾನೆ.

ಆರೋಪಿ ಅ.14 ರಿಂದ ಪರಾರಿಯಾಗಿದ್ದು, ವನ್ಯಜೀವಿ ಅರಣ್ಯ ಇಲಾಖೆ ಅಧಿಕಾರಿಗಳು ಆರೋಪಿಯ ಪತ್ತೆಗಾಗಿ ಬಲೆ ಬೀಸಿದ್ದಾರೆ

ವಿಟ್ಲ: ಕ್ವಾರಿ ಮಾಲಿಕನ ಬೇಜವಾಬ್ದಾರಿತನ ಹಾಗೂ ಸುರಕ್ಷತಾ ಕ್ರಮಗಳಿಲ್ಲದ ಕಂದಕದಿಂದಾಗಿ ಮೂರು ಕಾಡೆತ್ತುಗಳು (ಕಾಟಿ) ನೀರು ತುಂಬಿದ ಹೊಂಡಕ್ಕೆ ಬಿದ್ದು ದಾರುಣವಾಗಿ ಸಾವನ್ನಪ್ಪಿರುವ ಘಟನೆ ವಿಟ್ಲ ಹೊರವಲಯದ ಉಕ್ಕುಡ ವರಪ್ಪಾದೆ ಬಳಿ ವರದಿಯಾಗಿದೆ.

ವಿಟ್ಲದ ‘ಸೌಪರ್ಣಿಕ ಕ್ರಷರ್ ಅಂಡ್ ಕ್ವಾರಿ’ಯ ಆವರಣದಲ್ಲಿ ಈ ದುರಂತ ಸಂಭವಿಸಿದೆ. ಕ್ವಾರಿ ಕಾರ್ಯ ನಿಂತ ಬಳಿಕ ಅಥವಾ ಕೆಲಸದ ಮಧ್ಯೆಯೂ ಯಾವುದೇ ಸುರಕ್ಷತಾ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳದೆ, ಸುತ್ತಲೂ ತಡೆಬೇಲಿ (Fencing) ಅಳವಡಿಸದೆ ನೀರು ತುಂಬಿದ ಮರಣಗುಂಡಿಯನ್ನು ಹಾಗೇ ಬಿಡಲಾಗಿತ್ತು. ಇದರ ಪರಿಣಾಮವಾಗಿ ಕುಡಿಯುವ ನೀರು ಅಥವಾ ಅಲೆಯುತ್ತಾ ಬಂದ ಮೂರು ಮೂಕ ಪ್ರಾಣಿಗಳು ಈ ಅಪಾಯಕಾರಿ ಹೊಂಡಕ್ಕೆ ಬಿದ್ದು ಜೀವ ಕಳೆದುಕೊಂಡಿವೆ.

ಅಧಿಕಾರಿಗಳ ಭೇಟಿ ಹಾಗೂ ತನಿಖೆ

ಸ್ಥಳ ಪರಿಶೀಲನೆ: ಘಟನೆಯ ಸುದ್ದಿ ತಿಳಿಯುತ್ತಿದ್ದಂತೆ ಅರಣ್ಯಾಧಿಕಾರಿಗಳು ಮತ್ತು ಪಶುವೈದ್ಯರ ತಂಡ ಕೂಡಲೇ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿತು.

ಮರಣೋತ್ತರ ಪರೀಕ್ಷೆ: ಮೃತಪಟ್ಟ ಮೂರೂ ಕಾಡೆತ್ತುಗಳಿಗೆ ಸ್ಥಳದಲ್ಲೇ ಮರಣೋತ್ತರ ಪರೀಕ್ಷೆ ನಡೆಸಲು ಅರಣ್ಯ ಇಲಾಖೆ ಅಧಿಕಾರಿಗಳು ಕ್ರಮ ಕೈಗೊಂಡಿದ್ದಾರೆ.

ಸಾರ್ವಜನಿಕರ ಆಕ್ರೋಶ ಮತ್ತು ಕಾನೂನು ಕ್ರಮ

ಸುರಕ್ಷತಾ ನಿಯಮಗಳನ್ನು ಸಂಪೂರ್ಣವಾಗಿ ಗಾಳಿಗೆ ತೂರಿ, ಮೂರು ಮೂಕ ಜೀವಿಗಳ ಸಾವಿಗೆ ಕಾರಣವಾಗಿರುವ ಸೌಪರ್ಣಿಕ ಕ್ವಾರಿ ಮಾಲಿಕರ ವಿರುದ್ಧ ಸಾರ್ವಜನಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ಘಟನೆಗೆ ಸಂಬಂಧಿಸಿದಂತೆ ಕ್ವಾರಿ ಮಾಲಿಕರ ವಿರುದ್ಧ ಪ್ರಾಣಿ ಸಂರಕ್ಷಣಾ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು, ಮುಂದಿನ ಕಾನೂನು ಕ್ರಮ ಮುಂದುವರೆದಿದೆ.