ವಿಟ್ಲ: ಕಳೆದ ಎರಡು ವಾರಗಳಿಂದ ವಿಟ್ಲದ ಬೊಬ್ಬೆಕೇರಿಯಲ್ಲಿ ನಡೆಯುತ್ತಿರುವ ರಸ್ತೆ ಕಾಮಗಾರಿಯು ಸಾರ್ವಜನಿಕರ ಪಾಲಿಗೆ ಸಂಕಷ್ಟ ತಂದಿಟ್ಟಿದೆ. ಜಿಲ್ಲಾಧಿಕಾರಿಗಳ ಆದೇಶದಂತೆ ಈ ಮಾರ್ಗವನ್ನು ಏಕಮುಖ ರಸ್ತೆಯನ್ನಾಗಿ ಮಾಡಲಾಗಿದ್ದರೂ, ಗುತ್ತಿಗೆದಾರರು ಹಾಗೂ ಇಂಜಿನಿಯರ್‌ಗಳ ಬೇಜವಾಬ್ದಾರಿತನದಿಂದಾಗಿ ಇಡೀ ರಸ್ತೆ ಅಪಾಯದ ಗೂಡಾಗಿ ಪರಿವರ್ತನೆಯಾಗಿದೆ. ರಸ್ತೆಯ ಮಧ್ಯೆ ಸುಮಾರು 7 ಅಡಿ ಆಳದ ಬೃಹತ್ ಗುಂಡಿಗಳು ನಿರ್ಮಾಣವಾಗಿದ್ದು, ಸಂಚಾರ ದುಸ್ತರವಾಗಿದೆ.

ಸಾಲು ಸಾಲು ಅವಘಡಗಳು: ಶಾಲಾ ವಾಹನ, ಲಾರಿ ಗುಂಡಿಗೆ!

ರಸ್ತೆಯ ದುಸ್ಥಿತಿಯ ಬಗ್ಗೆ ವಾಹನ ಚಾಲಕರು ಮತ್ತು ಸಾರ್ವಜನಿಕರು ಸಂಬಂಧಪಟ್ಟ ಅಧಿಕಾರಿಗಳನ್ನು ಪ್ರಶ್ನಿಸಿದರೆ ಉಡಾಫೆಯ ಉತ್ತರ ಸಿಗುತ್ತಿದೆ ಎಂದು ಸಾರ್ವಜನಿಕರು ಆರೋಪಿಸಿದ್ದಾರೆ. ಇದೇ ಕಾರಣಕ್ಕೆ ಶಾಲಾ ವಾಹನಗಳು ಹಾಗೂ ಇತರೆ ಚಾಲಕರಿಗೆ ಜಾಗರೂಕರಾಗಿರುವಂತೆ ಮೊದಲೇ ಮನವಿ ಮಾಡಲಾಗಿತ್ತು. ಈಗಾಗಲೇ ಎರಡು-ಮೂರು ಆಟೋ ರಿಕ್ಷಾಗಳು ಹಾಗೂ ಹಲವಾರು ದ್ವಿಚಕ್ರ ವಾಹನಗಳು ಈ ಗುಂಡಿಗಳಿಗೆ ಬಿದ್ದು ಅಪಾಯದಿಂದ ಪಾರಾಗಿದ್ದವು.

ಇಂದು (25.06.2026) ಬೆಳಿಗ್ಗೆ ಭೀಕರ ಅವಘಡವೊಂದು ಸಂಭವಿಸಿದೆ:

ಶಾಲಾ ವಾಹನಕ್ಕೆ ಕುತ್ತು: ಬೆಳಿಗ್ಗೆ ಶಾಲಾ ಮಕ್ಕಳಿದ್ದ ವಾಹನವೊಂದು ಇದೇ 7 ಅಡಿ ಆಳದ ಗುಂಡಿಗೆ ಬಿದ್ದಿದ್ದು, ತಕ್ಷಣವೇ ಸ್ಥಳೀಯ ಸಾರ್ವಜನಿಕರು ಜಂಟಿಯಾಗಿ ಕಾರ್ಯಾಚರಣೆ ನಡೆಸಿ ವಾಹನವನ್ನು ಮೇಲಕ್ಕೆತ್ತಿದ್ದಾರೆ.

ಸಿಲುಕಿಕೊಂಡ ಕಲ್ಲು ಸಾಗಾಟದ ಲಾರಿ: ಶಾಲಾ ವಾಹನವನ್ನು ಎತ್ತಿದ ಕೆಲವೇ ಕ್ಷಣಗಳಲ್ಲಿ ಅದೇ ಗುಂಡಿಗೆ ಕಲ್ಲು ಸಾಗಿಸುತ್ತಿದ್ದ ಭಾರಿ ಗಾತ್ರದ ಲಾರಿಯೊಂದು ಬಿದ್ದು ಹೂತುಹೋಗಿದೆ. ಪರಿಣಾಮವಾಗಿ ಇಡೀ ಮಾರ್ಗ ಸಂಪೂರ್ಣವಾಗಿ ಬಂದ್ ಆಗಿದ್ದು, ಸಂಚಾರ ವ್ಯವಸ್ಥೆ ಸ್ತಬ್ಧಗೊಂಡಿದೆ. ಪ್ರಸ್ತುತ ಕ್ರೇನ್ ಮೂಲಕ ಲಾರಿಯನ್ನು ಹೊರತೆಗೆಯುವ ಕೆಲಸ ಭರದಿಂದ ಸಾಗುತ್ತಿದೆ.

ಕಳೆದ 3 ದಿನಗಳಲ್ಲಿ 12 ಕ್ಕೂ ಹೆಚ್ಚು ವಾಹನಗಳು ಇದೇ ಮೃತ್ಯುಕೂಪಕ್ಕೆ ಬಿದ್ದು ಭಾರಿ ಅಪಾಯದಿಂದ ಪಾರಾಗಿವೆ ಎಂದು ಸ್ಥಳೀಯರು ದೀವಟಿಗೆ ಮೀಡಿಯಾ ಮುಂದೆ ಆಕ್ರೋಶ ಹೊರಹಾಕಿದ್ದಾರೆ.

ರೋಲರ್ ಇಟ್ಟು ಕಳಪೆ ಮಾರ್ಗಕ್ಕೆ ವಾಹನ ಡೈವರ್ಷನ್!

ಕಳೆದ ಎರಡು ವಾರಗಳಿಂದ ನಡೆಯುತ್ತಿರುವ ಕಾಮಗಾರಿಯಲ್ಲಿ ರಸ್ತೆಯ ಒಂದು ಬದಿಯನ್ನು ಜಲ್ಲಿ ಹಾಗೂ ಬೋಲ್ಡರ್ಸ್ ಹಾಕಿ ಗಟ್ಟಿ ಮಾಡಲಾಗಿತ್ತು ಮತ್ತು ಸಂಚಾರಕ್ಕೆ ಮುಕ್ತಗೊಳಿಸಲಾಗಿತ್ತು. ಆದರೆ, ಏಕಾಏಕಿ ಆ ಸುಸ್ಥಿತಿಯಲ್ಲಿದ್ದ ರಸ್ತೆಯ ಮಧ್ಯೆ ರೋಲರ್ ಯಂತ್ರವನ್ನು ಅಡ್ಡಲಾಗಿ ಇಟ್ಟು, ವಾಹನಗಳು ಕಡ್ಡಾಯವಾಗಿ ಕಳಪೆ ಹಾಗೂ ಅಪಾಯಕಾರಿ ಮಾರ್ಗದಲ್ಲೇ ಚಲಿಸುವಂತೆ ಮಾಡಲಾಗಿದೆ. ಈ ಅವೈಜ್ಞಾನಿಕ ಕ್ರಮವೇ ಇಂದಿನ ಸಾಲು ಸಾಲು ಅವಘಡಗಳಿಗೆ ನೇರ ಕಾರಣವಾಗಿದೆ. ಕಳೆದ ಎರಡು ದಿನಗಳಿಂದ ಇಲ್ಲಿ ಯಾವುದೇ ಕಾಮಗಾರಿ ನಡೆಯುತ್ತಿಲ್ಲ ವಾಹನ ಚಾಲಕರ ನರಳಾಟವನ್ನು ಕೇಳುವವರೇ ಇಲ್ಲವಾಗಿದೆ.

ರಾಜಕಾಲುವೆ ಒತ್ತುವರಿ: ಅಧಿಕಾರಿಗಳ ಶಾಮೀಲು ಆರೋಪ?

ಕೇವಲ 100 ಮೀಟರ್ ರಸ್ತೆ ಕಾಮಗಾರಿ ನಡೆಸಲು ಬರೋಬ್ಬರಿ 3 ತಿಂಗಳು ಕಾಲಾವಕಾಶ ತಗೆದುಕೊಳ್ಳಲಾಗಿದ್ದು, ಮುಂಗಾರು ಮಳೆಯ ಈ ಸಂದರ್ಭದಲ್ಲಿ ಇಂತಹ ಕಾಮಗಾರಿ ನಡೆಸುವುದು ಎಷ್ಟು ಸೂಕ್ತ ಎಂಬ ಪ್ರಶ್ನೆ ಎದ್ದಿದೆ.

ಇದಕ್ಕೆ ಮುಖ್ಯ ಕಾರಣ ಅಲ್ಲಿ ಸೂಕ್ತ ಚರಂಡಿ ವ್ಯವಸ್ಥೆ ಇಲ್ಲದಿರುವುದು:

ರಾಜಕಾಲುವೆ ಬಂದ್: ಕರ್ನಾಟಕ ಬ್ಯಾಂಕ್ ಮತ್ತು ಹಿಂಭಾಗದ ತೋಟದ ಮೂಲಕ ಹರಿದು ಹೋಗುತ್ತಿದ್ದ ನೀರಿಗಾಗಿ ರಸ್ತೆಯ ಅಡಿಯಲ್ಲಿ ಹಾಕಲಾಗಿದ್ದ ಕಾಂಕ್ರೀಟ್ ಮೋರಿ (ರಾಜಕಾಲುವೆ) ಯನ್ನು ಖಾಸಗಿ ವ್ಯಕ್ತಿಯೊಬ್ಬರು ಸಂಪೂರ್ಣವಾಗಿ ಮುಚ್ಚಿದ್ದಾರೆ.

ತೋಟಗಳು ಜಲಾವೃತ: ರಾಜಕಾಲುವೆ ಮುಚ್ಚಿದ ಕಾರಣ ನೀರು ಸರಾಗವಾಗಿ ಹರಿದು ಹೋಗದೆ ಇಡೀ ತೋಟಗಳು ಮುಳುಗಡೆಯಾಗಿವೆ. ಈ ಅಕ್ರಮಕ್ಕೆ ಅಧಿಕಾರಿಗಳು ಕೂಡ ಶಾಮೀಲಾಗಿದ್ದಾರೆ ಎಂದು ಸಾರ್ವಜನಿಕರು ಗಂಭೀರ ಆರೋಪ ಮಾಡಿದ್ದಾರೆ. ರಾಜಕಾಲುವೆಯನ್ನು ತಕ್ಷಣ ತೆರವುಗೊಳಿಸದಿದ್ದರೆ ರಸ್ತೆ ಕಾಮಗಾರಿ ಮುಗಿದರೂ ಸಮಸ್ಯೆ ಮುಂದುವರಿಯಲಿದೆ.

ಸಾರ್ವಜನಿಕರಿಂದ ರಾತ್ರಿ ಕಾಮಗಾರಿ ಬಂದ್ ಮಾಡುವ ಎಚ್ಚರಿಕೆ!

ಪ್ರತಿದಿನ ರಾತ್ರಿ ವೇಳೆ ಕೆಲಸ ನಿರ್ವಹಿಸುವ ಕಾಮಗಾರಿಯ ಸಿಬ್ಬಂದಿಗಳು ಸಾರ್ವಜನಿಕರ ಯಾವುದೇ ಪ್ರಶ್ನೆಗಳಿಗೂ ಉತ್ತರಿಸುತ್ತಿಲ್ಲ. ಇಂದಿನ ಘಟನೆಯಿಂದ ಕೆರಳಿ ಕೆಂಡವಾಗಿರುವ ಸಾರ್ವಜನಿಕರು ಹಾಗೂ ವಾಹನ ಚಾಲಕರು ಅಧಿಕಾರಿಗಳಿಗೆ ಕಡಕ್ ಎಚ್ಚರಿಕೆ ನೀಡಿದ್ದಾರೆ: “ಇಂದು ಸಂಜೆಯೊಳಗಾಗಿ ಈ ಮೃತ್ಯುಕೂಪಗಳನ್ನು ಮುಚ್ಚಿ ರಸ್ತೆ ಸರಿಪಡಿಸದಿದ್ದರೆ, ರಾತ್ರಿ ಅವಧಿಯಲ್ಲಿ ಮುಂದಕ್ಕೆ ಯಾವುದೇ ಕಾಮಗಾರಿಯನ್ನು ನಡೆಸಲು ಬಿಡುವುದಿಲ್ಲ.”

ಸ್ಥಳೀಯರ ಈ ಆಕ್ರೋಶಕ್ಕೆ ಸಂಬಂಧಪಟ್ಟ ಇಲಾಖೆ ಹಾಗೂ ಜಿಲ್ಲಾಡಳಿತ ತಕ್ಷಣ ಸ್ಪಂದಿಸಿ ಶಾಶ್ವತ ಪರಿಹಾರ ಕಲ್ಪಿಸಬೇಕಿದೆ.