ಪುತ್ತೂರು: ದಕ್ಷಿಣ ಕನ್ನಡ ಜಿಲ್ಲೆಯ ಪ್ರಮುಖ ವಾಣಿಜ್ಯ ನಗರಿ, ಜಿಲ್ಲಾ ಕೇಂದ್ರವಾಗಲು ಎಲ್ಲಾ ಅರ್ಹತೆಗಳೊಂದಿಗೆ ಸಿದ್ಧತೆ ನಡೆಸುತ್ತಿರುವ ಹೆಮ್ಮೆಯ ನಗರ ಪುತ್ತೂರು. ಸಂವಿಧಾನದ ಆಶಯದಂತೆ ಇಲ್ಲಿನ ಕಟ್ಟಕಡೆಯ ವ್ಯಕ್ತಿಗೂ ನ್ಯಾಯ ಸಿಗಬೇಕು, ಭ್ರಷ್ಟಾಚಾರ-ಲಂಚಮುಕ್ತ ಆಡಳಿತವಿರಬೇಕು, ಶೈಕ್ಷಣಿಕ ಸಂಸ್ಥೆಗಳು ಮಕ್ಕಳ ಭವಿಷ್ಯವನ್ನು ರೂಪಿಸುವ ಪವಿತ್ರ ನಿಲಯಗಳಾಗಬೇಕೆಂದು ಇಲ್ಲಿನ ಜನಪ್ರಿಯ ಶಾಸಕರಾದ ಅಶೋಕ್ ಕುಮಾರ್ ರೈ ಅವರು ಘಂಟಾಘೋಷವಾಗಿ ಸಾರುತ್ತಾ ಬಂದಿದ್ದಾರೆ. ಆದರೆ, ಇದೇ ಪುತ್ತೂರು ನಗರದ ಹೃದಯಭಾಗದಲ್ಲಿ ಸದ್ದಿಲ್ಲದೆ, ಯಾವುದೇ ಕಾನೂನಿನ ಭಯವಿಲ್ಲದೆ ಮುದ್ದು ಕಂದಮ್ಮಗಳ ಬದುಕಿನ ಜೊತೆ ಚೆಲ್ಲಾಟವಾಡುವ ಆಘಾತಕಾರಿ ದಂಧೆಯೊಂದು ರಾಜಾರೋಷವಾಗಿ ಕಾರ್ಯಾಚರಿಸುತ್ತಿರುವುದು ಈಗ ಬಯಲಾಗಿದೆ!

ಹೌದು, ಸಮಾಜದ ಬಗ್ಗೆ ಕಾಳಜಿಯುಳ್ಳ ಸಾರ್ವಜನಿಕ ಹಿತಾಸಕ್ತಿಯುಳ್ಳ ಸಮಾಜಸೇವಕ ವೈದ್ಯರೊಬ್ಬರ ತೀಕ್ಷ್ಣ ಕಣ್ಣಿಗೆ ಬಿದ್ದ ಈ ಸತ್ಯ, ಇಡೀ ಪುತ್ತೂರಿನ ಪೋಷಕರು ಮತ್ತು ಶಿಕ್ಷಣ ಇಲಾಖೆ ತಲೆ ತಗ್ಗಿಸುವಂತೆ ಮಾಡಿದೆ.

ಲಿಫ್ಟ್ ಇಲ್ಲ, ಫೈರ್ ಸೇಫ್ಟಿ ಇಲ್ಲ: 3ನೇ ಮಹಡಿಯಲ್ಲಿ ಕಂದಮ್ಮಗಳ ಸೆರೆವಾಸ!

ಪುತ್ತೂರು ನಗರದ ಬೊಳ್ವಾರು ಎಂಬಲ್ಲಿರುವ “ಗಣೇಶ್ ಪ್ರಸಾದ್” ಹೆಸರಿನ ಕಟ್ಟಡದ 3ನೇ ಮಹಡಿಯಲ್ಲಿ ಯಾವುದೇ ಬೋರ್ಡ್ ಹಾಕದೆ, ತಾನೊಂದು ಅನಧಿಕೃತ ಸಂಸ್ಥೆ ಎಂಬುದನ್ನು ಸಾಬೀತುಪಡಿಸುವಂತೆ ಈ “ಮಕ್ಕಳ ಮನೆ” ಕಾರ್ಯಾಚರಿಸುತ್ತಿದೆ.

ಅಲ್ಲಿನ ವಾಸ್ತವ ಸ್ಥಿತಿ ನೋಡಿದರೆ ಎಂಥವರಿಗೂ ಮೈ ಜುಂ ಎನ್ನುತ್ತದೆ:

ಅಪಾಯಕಾರಿ 3ನೇ ಮಹಡಿ: ಕನಿಷ್ಠ ನಡೆದಾಡಲು ಬಾರದ, ಓಡಾಡುವ ವಯಸ್ಸಿನ ಪುಟ್ಟ ಮಕ್ಕಳಿಗೆ ಯಾವುದೇ ಲಿಫ್ಟ್ ಸೌಲಭ್ಯವಿಲ್ಲದ ಮೂರನೇ ಮಹಡಿಯಲ್ಲಿ ಈ ಕೇಂದ್ರವನ್ನು ನಡೆಸಲಾಗುತ್ತಿದೆ.

ರೂಪರೇಷೆಯಿಲ್ಲದ ಹಾಲ್, ಪಕ್ಕದಲ್ಲೇ ಅಡುಗೆ ಕೋಣೆ: ಒಂದು ಉದ್ದನೆಯ ಹಾಲ್, ಅದಕ್ಕೆ ಯಾವುದೇ ಪಾರ್ಟಿಷನ್ ಇಲ್ಲ. ಅದೇ ಹಾಲ್‌ನಲ್ಲಿ ಬೇಬಿ ಸಿಟ್ಟಿಂಗ್, ನರ್ಸರಿ, ಎಲ್‌ಕೆಜಿ, ಯುಕೆಜಿ ಕ್ಲಾಸುಗಳು! ಅಷ್ಟೇ ಏಕೆ, ಅದರ ಒಟ್ಟಿಗೇ ಅಡುಗೆ ಕೋಣೆಯೂ ಇದೆ. ಗ್ಯಾಸ್ ಸಿಲಿಂಡರ್ ಪಕ್ಕದಲ್ಲೇ ಪುಟ್ಟ ಕಂದಮ್ಮಗಳು ಆಟವಾಡಬೇಕಾದ ದುಸ್ಥಿತಿ ಇಲ್ಲಿದೆ.

ಗಾಳಿಗೆ ತೂರಿದ ಸುರಕ್ಷತೆ: ತುರ್ತು ಸಂದರ್ಭದಲ್ಲಿ ಕೆಳಗೆ ಬರಲು ಯಾವುದೇ ಪರ್ಯಾಯ ದಾರಿಯಿಲ್ಲ, ಅಗ್ನಿಶಾಮಕ ಸುರಕ್ಷತೆ (Fire Safety) ಇಲ್ಲವೇ ಇಲ್ಲ. ಇನ್ನು ಮಕ್ಕಳಿಗೆ ಬಳಸುವ ವಾಶ್ ರೂಮ್ ಇರುವುದು ಕೊಠಡಿಯಿಂದ ಹೊರಗಡೆ!

ತಿಂಗಳಿಗೆ 4 ಸಾವಿರಕ್ಕೂ ಅಧಿಕ ಲೂಟಿ!

ಒಂದು ಜೀವ ಉಳಿಸುವ ವೈದ್ಯಕೀಯ ಕ್ಲಿನಿಕ್ ಆರಂಭಿಸಬೇಕಾದರೆ ಎರಡನೇ ಮಹಡಿಯಲ್ಲಿದೆ ಎಂಬ ಕಾರಣಕ್ಕೆ ಅನುಮತಿ ನಿರಾಕರಿಸುವ ನಿಯಮಗಳು ಇಲ್ಲಿ ಎಲ್ಲಿ ಹೋದವು? ಪುಟ್ಟ ಕಂದಮ್ಮಗಳ ಕ್ಲಾಸಿಗೆ 3ನೇ ಮಹಡಿಯಲ್ಲಿ ಪರ್ಮಿಷನ್ ಕೊಟ್ಟವರು ಯಾರು? ಎಲ್‌ಕೆಜಿ ಮಗುವಿಗೆ ತಿಂಗಳಿಗೆ ಬರೋಬ್ಬರಿ 4,000 ರೂಪಾಯಿಗಿಂತಲೂ ಅಧಿಕ ಫೀಸ್ ವಸೂಲಿ ಮಾಡಲಾಗುತ್ತಿದೆ ಎಂದರೆ, ಇನ್ನು ಬೇಬಿ ಸಿಟ್ಟಿಂಗ್ ಹೆಸರಿನಲ್ಲಿ ಹೆತ್ತವರಿಂದ ಎಷ್ಟು ಹಣ ಲೂಟಿ ಮಾಡಲಾಗುತ್ತಿರಬಹುದು? ಇದು ಶಿಕ್ಷಣ ಸಂಸ್ಥೆಯೋ ಅಥವಾ ಕಂದಮ್ಮಗಳನ್ನು ಇಟ್ಟುಕೊಂಡು ಮಾಡುತ್ತಿರುವ ಕಾಸಿನ ದಂಧೆಯೋ?

ಇಲಾಖೆಗಳಿಗೂ ಗೊತ್ತಿಲ್ಲ, ಅಧಿಕಾರಿಗಳಿಗೂ ಸುದ್ದಿಯಿಲ್ಲ!

ಈ ಗಂಭೀರ ದಂಧೆಯ ಬೆನ್ನುಬಿದ್ದ ಆ ಸಮಾಜಸೇವಕ ವೈದ್ಯರು ಮೊದಲು ಶಿಕ್ಷಣ ಇಲಾಖೆಯನ್ನು ಸಂಪರ್ಕಿಸಿದಾಗ ಅಧಿಕಾರಿಗಳು ನೀಡಿದ ಉತ್ತರ ನಿಜಕ್ಕೂ ಬೆಚ್ಚಿಬೀಳಿಸುವಂತಿತ್ತು. “ನಾವು ಇದಕ್ಕೆ ಅನುಮತಿ ನೀಡಿಲ್ಲ, ಅದು ನಮ್ಮ ಅಂಡರ್‌ಗೆ ಬರುವುದಿಲ್ಲ” ಎಂದ ಇಲಾಖೆ, “ಅದು ಎಲ್ಲಿದೆ?” ಎಂದು ಉಲ್ಟಾ ಪ್ರಶ್ನೆ ಮಾಡಿದೆ! ತದನಂತರ ಶಿಶು ಅಭಿವೃದ್ಧಿ ಯೋಜನಾಧಿಕಾರಿಗಳ (CDPO) ಕಚೇರಿಗೆ ಭೇಟಿ ನೀಡಿ ವಿಚಾರಿಸಿದಾಗ, ಅಲ್ಲಿನ ಅಧಿಕಾರಿಗಳಿಗೂ ಈ ಸಂಸ್ಥೆಯ ಬಗ್ಗೆಯಾಗಲಿ, ಅನುಮತಿ ನೀಡಿರುವ ಬಗ್ಗೆಯಾಗಲಿ ಯಾವುದೇ ಮಾಹಿತಿಯೇ ಇಲ್ಲ!

ಯಾರ ಅನುಮತಿಯೂ ಇಲ್ಲದೆ ಇಷ್ಟೊಂದು ದೊಡ್ಡ ಮಟ್ಟದಲ್ಲಿ ಕಂದಮ್ಮಗಳ ಭವಿಷ್ಯದ ಜೊತೆ ಚೆಲ್ಲಾಟವಾಡುತ್ತಿರುವುದನ್ನು ಕಂಡು ಆಕ್ರೋಶಗೊಂಡ ವೈದ್ಯರು, “ನಾನೇ ಈ ಬಗ್ಗೆ ಅಧಿಕೃತ ದೂರು ನೀಡುತ್ತೇನೆ, ತಕ್ಷಣ ಅಲ್ಲಿಗೆ ಹೋಗಿ ತನಿಖೆ ನಡೆಸಿ ಬೀಗ ಜಡಿಯಬೇಕು. ಇನ್ನು ಮುಂದೆ ಪುತ್ತೂರಿನಲ್ಲಿ ಇಂತಹ ಒಂದೇ ಒಂದು ಅನಧಿಕೃತ ಸಂಸ್ಥೆಯೂ ಇರಬಾರದು” ಎಂದು ಅಧಿಕಾರಿಗಳಿಗೆ ಎಚ್ಚರಿಕೆ ನೀಡಿ ಮಾಧ್ಯಮಗಳ ಮುಂದೆ ಸತ್ಯವನ್ನು ಬಿಚ್ಚಿಟ್ಟಿದ್ದಾರೆ.

ನಿಯಮದ ಪುಸ್ತಕದಲ್ಲೇನಿದೆ? ಈ ಸಂಸ್ಥೆಯಲ್ಲಿ ಏನಿದೆ?

ಸರ್ಕಾರದ ನಿಯಮಾವಳಿಗಳ ಪ್ರಕಾರ ಒಂದು ಪ್ರಿ-ಸ್ಕೂಲ್ ಅಥವಾ ಬೇಬಿ ಸಿಟ್ಟಿಂಗ್ ನಡೆಸಲು ಈ ಕೆಳಗಿನ ದಾಖಲೆಗಳು ಕಡ್ಡಾಯ:

ಈ ಯಾವುದೇ ನಿಯಮಗಳನ್ನು ಪಾಲಿಸದೆ ಮಕ್ಕಳನ್ನು ಕೂಡಿಟ್ಟಿರುವುದು ದಂಧೆಯಲ್ಲದೆ ಇನ್ನೇನು?

ಪೋಷಕರೇ ಎಚ್ಚರ.. ಎಚ್ಚರ..!

ತಮ್ಮ ಮಕ್ಕಳಿಗೆ ಉತ್ತಮ ಭವಿಷ್ಯ ಸಿಗಲಿ ಎಂದು ಕಷ್ಟಪಟ್ಟು ದುಡಿದ ಹಣವನ್ನು ತಂದು ಸುರಿಯುವ ಪೋಷಕರಿಗೆ ಈ ಸಂಸ್ಥೆಯ ಅಸಲಿ ಮುಖ ತಿಳಿಯಬೇಕಿದೆ. ಈ ವರದಿ ಪ್ರಕಟವಾಗುವವರೆಗೂ ಆ ಸಂಸ್ಥೆ ಎಲ್ಲಿದೆ ಎಂದು ನಾವು ಗುಪ್ತವಾಗಿಟ್ಟಿದ್ದೆವು. ಈಗಲಾದರೂ ಹೆತ್ತವರು ಎಚ್ಚೆತ್ತುಕೊಳ್ಳಲಿ, ತಮ್ಮ ಮಕ್ಕಳನ್ನು ಕಳುಹಿಸುತ್ತಿರುವ ಜಾಗ ಎಷ್ಟು ಸುರಕ್ಷಿತ ಎಂಬುದನ್ನು ಅರಿತುಕೊಳ್ಳಲಿ ಎಂಬುವುದೇ ನಮ್ಮ ಆಶಯ.

ಇದು ಕೇವಲ ಪುತ್ತೂರು ಪುರಸಭಾ ವ್ಯಾಪ್ತಿಗಷ್ಟೇ ಸೀಮಿತವಾಗಿಲ್ಲ. ಶೈಕ್ಷಣಿಕ ಮಾಫಿಯಾ ಎಂಬುದು ದಕ್ಷಿಣ ಕನ್ನಡ ಜಿಲ್ಲೆಯಾಧ್ಯಂತ ತನ್ನ ಕರಾಳಬಾಹುವನ್ನು ವಿಸ್ತರಿಸಿದ್ಧು ತಕ್ಷಣವೇ ಇಲಾಖೆ ಅಧಿಕಾರಿಗಳು ಎಚ್ಚೆತ್ತುಕೊಂಡು ಜಿಲ್ಲೆಯಲ್ಲಿ ನಡೆಯುತ್ತಿರುವ ಮೂವತ್ತಕ್ಕೂ ಹೆಚ್ಚು ನಿಯಮಬಾಹಿರ ಸಂಸ್ಥೆಗಳ ವಿರುದ್ಧ ಕಾನೂನುಕ್ರಮ ಜರುಗಿಸಬೇಕಾಗಿದೆ.

ಕೊನೆಯ ಮಾತು: ಇಲಾಖೆಗಳು ಇರುವುದು ಯಾಕೆ?

ಇಷ್ಟೆಲ್ಲಾ ಕಾನೂನು ಬಾಹಿರ ಚಟುವಟಿಕೆಗಳು ನಗರದ ಮಧ್ಯದಲ್ಲೇ ನಡೆಯುತ್ತಿದ್ದರೂ ಕಣ್ಣು ಮುಚ್ಚಿ ಕುಳಿತಿರುವ ಇಲಾಖೆಗಳು ಇರುವುದು ಯಾಕೆ? ಎಂಬುದು ಈಗ ಪುತ್ತೂರಿನ ಸಾರ್ವಜನಿಕರ ಮುಂದಿರುವ ಮಿಲಿಯನ್ ಡಾಲರ್ ಪ್ರಶ್ನೆ. ಈ ಕೂಡಲೇ ಸಂಬಂಧಪಟ್ಟ ಪುರಸಭೆ, ಶಿಕ್ಷಣ ಇಲಾಖೆ ಹಾಗೂ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಅಧಿಕಾರಿಗಳು ಎಚ್ಚೆತ್ತುಕೊಂಡು, ತಕ್ಷಣವೇ ಈ ಅನಧಿಕೃತ ಸಂಸ್ಥೆಯ ಮೇಲೆ ಕಾನೂನು ಕ್ರಮ ಜರುಗಿಸಬೇಕಾಗಿದೆ. ಇಲ್ಲದಿದ್ದರೆ ಮಕ್ಕಳ ಜೀವಕ್ಕೆ ಏನಾದರೂ ಅಪಾಯವಾದರೆ ಅದಕ್ಕೆ ಇಲಾಖೆಯೇ ನೇರ ಹೊಣೆಯಾಗಬೇಕಾಗುತ್ತದೆ!