ಮಂಗಳೂರು: ಕಷ್ಟಪಟ್ಟು ಸಂಪಾದಿಸಿದ ಹಣವನ್ನು ಒಂದಕ್ಕೆ ಎರಡಷ್ಟು ಮಾಡಿಕೊಳ್ಳುವಾಸೆಯಿಂದ ಅಥವಾ ತಿಂಗಳ ಕಂತುಗಳಲ್ಲಿ ಚಿನ್ನ-ಕಾರು ಗೆಲ್ಲುವ ಆಸೆಯಿಂದ ಹಣ ಹೂಡಿಕೆ ಮಾಡುವ ಅಮಾಯಕರನ್ನು ಗುರಿಯಾಗಿಸಿಕೊಂಡು ನಡೆಯುವ ವಂಚನೆಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇವೆ. ಇದಕ್ಕೆ ತಾಜಾ ಉದಾಹರಣೆ ಎಂಬಂತೆ, ಮಂಗಳೂರಿನಲ್ಲಿ “ಅಸ್ತ್ರ ಅಕ್ಷಯ ಪಾತ್ರೆ” ಹೆಸರಿನಲ್ಲಿ ಕೋಟ್ಯಂತರ ರೂ. ವಂಚನೆ ಎಸಗಿದ್ದ ಮುಖ್ಯ ಆರೋಪಿ ಲಂಚುಲಾಲ್, ಸದ್ದಿಲ್ಲದೆ ದೇಶ ಬಿಟ್ಟು ದುಬೈಗೆ ಪರಾರಿಯಾಗಿದ್ದಾನೆ.

ಜನರ ಜೀವಮಾನದ ಕಷ್ಟದ ಸಂಪಾದನೆಯನ್ನು ದೋಚಿ, ಈಗ ನೂರಾರು ಕುಟುಂಬಗಳನ್ನು ಬೀದಿಗೆ ತಳ್ಳಿರುವ ಈ ದೊಡ್ಡ ಮಟ್ಟದ ವಂಚನೆಯ ಕಥಾನಕ ಇಲ್ಲಿದೆ.

ವಂಚನೆಯ ಜಾಲ ಹೇಗೆ ಕೆಲಸ ಮಾಡಿತು?

ತಿಂಗಳಿಗೆ 1000 ರೂ. ಕಂತು: ಅಸ್ತ್ರ ಅಕ್ಷಯ ಪಾತ್ರೆ ಸ್ಕೀಮ್ ಹೆಸರಿನಲ್ಲಿ ಜನರಿಂದ ಪ್ರತಿ ತಿಂಗಳು ಸಾವಿರಾರು ರೂಪಾಯಿಗಳನ್ನು ಕಂತುಗಳ ರೂಪದಲ್ಲಿ ಸಂಗ್ರಹಿಸಲಾಗುತ್ತಿತ್ತು.

ಆಕರ್ಷಕ ಆಮಿಷಗಳು: ಪ್ರತಿ ತಿಂಗಳು ಡ್ರಾ ನಡೆಸಿ ದುಬಾರಿ ಕಾರು, ಫ್ಲಾಟ್‌ಗಳು ಮತ್ತು ಚಿನ್ನದ ಆಭರಣಗಳನ್ನು ಗೆಲ್ಲಿಸಿಕೊಡುವುದಾಗಿ ಹೇಳಿ ಜನರನ್ನು ಗ್ಯಾಂಬ್ಲಿಂಗ್ ಮಾದರಿಯಲ್ಲಿ ಸೆಳೆಯಲಾಗುತ್ತಿತ್ತು.

ಗುರಿಯಾದವರು ಯಾರು? ಬಡವರು, ದಿನಗೂಲಿ ಕಾರ್ಮಿಕರು, ಮೇಸ್ತ್ರಿಗಳು, ಸಣ್ಣಪುಟ್ಟ ಅಂಗಡಿ ಹಾಗೂ ಹೋಟೆಲ್‌ಗಳಲ್ಲಿ ಕೆಲಸ ಮಾಡುವವರೇ ಈ ಮೋಸದ ಜಾಲಕ್ಕೆ ಹೆಚ್ಚು ಬಲಿಯಾಗಿದ್ದಾರೆ. ಚಿನ್ನದ ಕಡಗ, ಕೊರಳಿಗೆ ಮಣಿಸರ ಧರಿಸಿ ಶೋಕಿ ಮಾಡುತ್ತಿದ್ದ ಲಂಚುಲಾಲ್, ಕೆಲ ತುಳು ಸಿನಿಮಾಗಳಿಗೂ ಹಣ ಹೂಡಿಕೆ ಮಾಡಿ ಜನರನ್ನು ನಂಬಿಸಿದ್ದ.

ನಾಟಕೀಯ ಪರಾರಿ ಮತ್ತು ಕಚೇರಿಗಳಿಗೆ ಬೀಗ

ಕಳೆದ 3-4 ವರ್ಷಗಳಿಂದ ರಾಜಾರೋಷವಾಗಿ ನಡೆದುಕೊಂಡು ಬಂದಿದ್ದ ಈ ದಂಧೆ ಈಗ ಸಂಪೂರ್ಣವಾಗಿ ಮುಳುಗಿದೆ.

ಪ್ರಧಾನ ಕಚೇರಿ ಬಂದ್: ಮಂಗಳೂರಿನಲ್ಲಿದ್ದ ಅಸ್ತ್ರ ಹೆಸರಿನ ಪ್ರಧಾನ ಕಚೇರಿ, ಎಂಪೈರ್ ಮಾಲ್‌ನಲ್ಲಿದ್ದ ಕಚೇರಿ, ಫಳ್ನೀರ್‌ನ ಚಿನ್ನದ ಅಂಗಡಿ ಮತ್ತು ಬಂಟ್ಸ್ ಹಾಸ್ಟೆಲ್ ಬಳಿಯ ಐಸ್ ಕ್ರೀಮ್ ಪಾರ್ಲರ್‌ಗೆ ಬೀಗ ಜಡಿಯಲಾಗಿದೆ.

ದುಬೈನಿಂದ ವಿಡಿಯೋ ನಾಟಕ: ಗ್ರಾಹಕರು ಹಣಕ್ಕಾಗಿ ಮುತ್ತಿಗೆ ಹಾಕಿದಾಗ ದುಬೈಗೆ ಹಾರಿದ್ದ ಈ ವಂಚಕ, “ನಾನು ಯಾರ ಹಣವನ್ನೂ ವಂಚಿಸುವುದಿಲ್ಲ, ದುಬೈಗೆ ಬಿಸಿನೆಸ್ ಕೆಲಸಕ್ಕೆ ಬಂದಿದ್ದೇನೆ, ಆಗಸ್ಟ್-ಸೆಪ್ಟಂಬರ್ ಒಳಗೆ ಹಣ ನೀಡುತ್ತೇನೆ” ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ಬಿಟ್ಟು ಹಸಿ ಹಸಿ ಸುಳ್ಳು ಹೇಳಿದ್ದ.

ತಪ್ಪಿಸಿಕೊಂಡ ಚೇಲಾಗಳು: ಲಂಚುಲಾಲ್ ದುಬೈಗೆ ಪರಾರಿಯಾಗುತ್ತಿದ್ದಂತೆ ಆತನ ಏಜೆಂಟರು ಮತ್ತು ಆಪ್ತರು ಸಹ ತಲೆಮರೆಸಿಕೊಂಡಿದ್ದಾರೆ.

ಕಣ್ಮುಚ್ಚಿ ಕುಳಿತ ಆಡಳಿತ ವ್ಯವಸ್ಥೆ?

ಪೊಲೀಸ್ ಎಚ್ಚರಿಕೆಯೂ ವ್ಯರ್ಥ: ಒಂದು ವರ್ಷದ ಹಿಂದೆಯೇ ಪೊಲೀಸ್ ಕಮಿಷನರ್ ಅವರು ಇಂತಹ ನಕಲಿ ಸ್ಕೀಮ್ ದಂಧೆಕೋರರನ್ನು ಎಚ್ಚರಿಸಿದ್ದರು. ಆದರೆ ಕಮಿಷನರ್ ಕಚೇರಿಯಲ್ಲಿ 5 ಕೋಟಿ ರೂ. ಬಾಂಡ್ ಇಟ್ಟಿರುವುದಾಗಿ ಸುಳ್ಳು ಹೇಳಿ ಲಂಚುಲಾಲ್ ದಂಧೆಯನ್ನು ಮುಂದುವರಿಸಿದ್ದ. ಈಗ ಹಣ ಕಳೆದುಕೊಂಡವರು ಆ 5 ಕೋಟಿ ರೂ. ಮೇಲೆ ಕಣ್ಣಿಟ್ಟಿದ್ದಾರೆ.

ನಿರ್ಲಕ್ಷ್ಯದ ಆರೋಪ: ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ಹಣಕಾಸು ವಂಚನೆ ನಡೆಯುತ್ತಿದ್ದರೂ ಆದಾಯ ತೆರಿಗೆ ಇಲಾಖೆ (IT) ಹಾಗೂ ಜಾರಿ ನಿರ್ದೇಶನಾಲಯ (ED) ಅಧಿಕಾರಿಗಳು ಮೌನ ವಹಿಸಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ವಿಶ್ಲೇಷಣೆ: ಮಂಗ ಆಗುವವರು ಇರುವವರೆಗೆ ಮಂಗ ಮಾಡುವವರು ಇದ್ದೇ ಇರುತ್ತಾರೆ!

ಇದು ಕೇವಲ ಲಂಚುಲಾಲ್ ಎಂಬ ವ್ಯಕ್ತಿಯ ವಂಚನೆಯ ಕತೆಯಲ್ಲ; ಬದಲಿಗೆ “ಸುಲಭವಾಗಿ ಹಣ ಸಂಪಾದನೆ” ಅಥವಾ “ಕೈಯಲ್ಲಿದ್ದ ಹಣವನ್ನು ಕೆಲವೇ ತಿಂಗಳುಗಳಲ್ಲಿ ಇಮ್ಮಡಿಗೊಳಿಸುವ” ದುರಾಶೆ ಹಾಗೂ ಮೂಢನಂಬಿಕೆಯ ಹಿಂದೆ ಬಲಿಯಾದ ಸಮಾಜದ ಒಂದು ವರ್ಗದ ಕಣ್ಣು ತೆರೆಸಬೇಕಾದ ಪಾಠವಾಗಿದೆ. ಯಾವುದೇ ಅಧಿಕೃತ ಬ್ಯಾಂಕಿಂಗ್ ಅಥವಾ ಹಣಕಾಸು ನಿಯಮಗಳಿಲ್ಲದೆ, ಕೇವಲ ಭರವಸೆಗಳ ಮೇಲೆ ನಂಬಿಕೆ ಇಟ್ಟು ಲಕ್ಷಾಂತರ ರೂಪಾಯಿಗಳನ್ನು ಅಪರಿಚಿತರ ಕೈಗೆ ಒಪ್ಪಿಸುವ ಮುನ್ನ ಜನಸಾಮಾನ್ಯರು ಗಂಭೀರವಾಗಿ ಯೋಚಿಸಬೇಕಾದ ತುರ್ತು ಅಗತ್ಯವಿದೆ.

ಇನ್ನಾದರೂ ಇಂತಹ ನಕಲಿ ಸ್ಕೀಮ್‌ಗಳ ಬಗ್ಗೆ ಎಚ್ಚೆತ್ತುಕೊಳ್ಳದಿದ್ದರೆ, ಕಷ್ಟಪಟ್ಟು ಸಂಪಾದಿಸಿದ ಹಣ ಗಾಳಿಗೆ ತೂರಿದಂತೆಯೇ ಸರಿ!

ಸಾರ್ವಜನಿಕರ ಗಮನಕ್ಕೆ: ಇನ್ನಾದರೂ ಎಚ್ಚೆತ್ತುಕೊಳ್ಳಿ!

ಉಚಿತವಾಗಿ ಅಥವಾ ಸುಲಭವಾಗಿ ಏನೂ ಸಿಗುವುದಿಲ್ಲ: ಕಷ್ಟಪಟ್ಟು ದುಡಿದ ಹಣಕ್ಕೆ ಮಾತ್ರ ನಿಜವಾದ ಮೌಲ್ಯವಿದೆ. ತಿಂಗಳಿಗೆ ಸಾವಿರ ಕಟ್ಟಿ ಲಕ್ಷ ಪಡೆಯುವ ಕಲ್ಪನೆ ಕೇವಲ ಹಗಲುಗನಸು.

ಸರಕಾರದ ಮಾನ್ಯತೆ ಪರಿಶೀಲಿಸಿ: ಯಾವುದೇ ಕಂಪನಿ ಅಥವಾ ಸ್ಕೀಮ್‌ಗೆ ಆರ್‌ಬಿಐ (RBI), SEBI ಅಥವಾ ಸರಕಾರದ ಮಾನ್ಯತೆ ಇದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ.

ವೇದಿಕೆಯ ರಂಗು ನೋಡಿ ಮರುಳಾಗಬೇಡಿ: ಉದ್ಘಾಟನೆಗೆ ಯಾರು ಬಂದಿದ್ದಾರೆ ಎಂಬುದಕ್ಕಿಂತ, ಆ ಸ್ಕೀಮ್‌ನ ಕಾಯ್ದೆ-ಕಾನೂನು ಚೌಕಟ್ಟು ಏನು ಎಂಬುದ ಮುಖ್ಯ.

ಕೊನೆ ಮಾತು: ಆಸೆಯೇ ದುಃಖಕ್ಕೆ ಮೂಲ. ವಂಚಕರು ನಿಮ್ಮ ದುರಾಸೆಯನ್ನೇ ಬಂಡವಾಳ ಮಾಡಿಕೊಳ್ಳುತ್ತಾರೆ. ಕಷ್ಟಪಟ್ಟು ದುಡಿದ ನಿಮ್ಮ ಹಣವನ್ನು ಇಂತಹ ಅಕ್ರಮ ಲಕ್ಕಿ ಸ್ಕೀಮ್‌ಗಳಿಗೆ ಸುರಿದು ಕುಟುಂಬವನ್ನು ಬೀದಿಗೆ ತಳ್ಳಬೇಡಿ. ಬಣ್ಣದ ಮಾತುಗಳಿಗೆ ಮರುಳಾಗದೆ, ಇನ್ನಾದರೂ ಎಚ್ಚೆತ್ತುಕೊಳ್ಳಿ!

ಮಂಗಳೂರಿನಲ್ಲಿ ನಡೆದ ಅತ್ಯಂತ ಕರಾಳ ಹಾಗೂ ಬೆಚ್ಚಿಬೀಳಿಸುವ ಡಿಜಿಟಲ್ ಅರೆಸ್ಟ್ ವಂಚನೆಯೊಂದು ಬೆಳಕಿಗೆ ಬಂದಿದೆ. ಪೊಲೀಸ್ ಮತ್ತು ಸಿಬಿಐ ಅಧಿಕಾರಿಗಳ ಸೋಗಿನಲ್ಲಿ ಕರಾವಳಿಯ 75 ವರ್ಷದ ಹಿರಿಯ ಮಹಿಳೆಯೊಬ್ಬರನ್ನು ಟಾರ್ಗೆಟ್ ಮಾಡಿದ ವಂಚಕರು, ಅಕ್ಷರಶಃ ಬೆವರಿಸಿ ಕೋಟ್ಯಂತರ ರೂಪಾಯಿ ದೋಚಿರುವ ಕೃತ್ಯ ಈಗ ಜನತೆಯನ್ನು ಬೆಚ್ಚಿಬೀಳಿಸಿದೆ. ಸೆಪ್ಟೆಂಬರ್ 25 ರಂದು ವೃದ್ಧೆಯ ಮೊಬೈಲ್ ಬಾರಿಸುತ್ತಿದ್ದಂತೆ ಶುರುವಾದ ಈ ದುಷ್ಕೃತ್ಯ ಅಕ್ಟೋಬರ್ 5 ರವರೆಗೆ ನಿರಂತರವಾಗಿ ನಡೆದು, ಕೊನೆಗೆ ಒಟ್ಟು 2 ಕೋಟಿ ರೂ. ಹಣ ಸೈಬರ್ ಖದೀಮರ ಪಾಲಾಗಿದೆ.

ಮುಂಬೈನ ಕೊಲಾಬಾ ಪೊಲೀಸ್ ಠಾಣೆಯ ಅಧಿಕಾರಿ ಸಂದೀಪ್ ರಾವ್ ಎಂದು ಪರಿಚಯಿಸಿಕೊಂಡ ವಂಚಕ, ಅಂತರಾಷ್ಟ್ರೀಯ ಹಣ ಅಕ್ರಮ ವರ್ಗಾವಣೆ ಪ್ರಕರಣದ ರೂವಾರಿ ನರೇಶ್ ಗೋಯಲ್ ಜೊತೆ ಮಹಿಳೆಗೆ ನಂಟುಂಟು ಮಾಡಿ, ಮಾದಕವಸ್ತು ಹಾಗೂ ಮಕ್ಕಳ ಕಳ್ಳಸಾಗಣೆಯಂತಹ ಗಂಭೀರ ಆರೋಪ ಹೊರಿಸಿ ಆತಂಕ ಸೃಷ್ಟಿಸಿದ. ಬೆನ್ನಲ್ಲೇ ವಾಟ್ಸಾಪ್ ವಿಡಿಯೋ ಕರೆಯಲ್ಲಿ ಪ್ರತ್ಯಕ್ಷನಾದ ಸಿಬಿಐ ಅಧಿಕಾರಿ ಸಮಾಧಾನ್ ಪವಾರ್ ಎಂಬ ಮತ್ತೊಬ್ಬ ವಂಚಕ, ನ್ಯಾಷನಲ್ ಸೀಕ್ರೆಸಿ ಆಕ್ಟ್ ನೆಪವೊಡ್ಡಿ ನೀವು ಸಂಪೂರ್ಣ ಸರ್ವೆಲೆನ್ಸ್ ನಲ್ಲಿದ್ದೀರಿ, ಈ ವಿಚಾರವನ್ನು ಯಾರಿಗೂ ಬಾಯಬಿಡಬಾರದು ಎಂದು ಜೀವ ಭಯ ಹುಟ್ಟಿಸಿದ್ದಾನೆ. ಆಸ್ತಿ ಹಾಗೂ ಬ್ಯಾಂಕ್ ಖಾತೆಗಳ ಪರಿಶೀಲನೆ ನೆಪದಲ್ಲಿ ವೃದ್ಧೆಯನ್ನು ಸಂಪೂರ್ಣ ದಿಢೀರ್ ದಿಗ್ಬಂಧನಕ್ಕೆ (ಡಿಜಿಟಲ್ ಅರೆಸ್ಟ್) ಒಳಪಡಿಸಿದ ಖದೀಮರು, ಅವರ ಹೆದರಿಕೆಯ ಲಾಭ ಪಡೆದು ಹಂತ ಹಂತವಾಗಿ ಆರ್‌ಟಿಜಿಎಸ್ ಮೂಲಕ ಮೊದಲಿಗೆ 60 ಲಕ್ಷ ರೂ. ಹಾಗೂ ನಂತರ 1.40 ಕೋಟಿ ರೂ. ಸೇರಿದಂತೆ ಒಟ್ಟು ಬರೋಬ್ಬರಿ 2 ಕೋಟಿ ರೂ. ಅನ್ನು ತಮ್ಮ ನಿರ್ದಿಷ್ಟ ಖಾತೆಗಳಿಗೆ ವರ್ಗಾಯಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಸೈಬರ್ ವಂಚಕರು ನಡೆಸುತ್ತಿರುವ ಈ ರೀತಿಯ ಹೈ-ಟೆಕ್ ದರೋಡೆಗಳು ಸಮಾಜವನ್ನು ಆತಂಕಕ್ಕೆ ನೂಕಿದ್ದು, ಯಾವುದೇ ಪೊಲೀಸ್ ಅಥವಾ ತನಿಖಾ ಸಂಸ್ಥೆಯ ಅಧಿಕಾರಿಗಳು ವಾಟ್ಸಾಪ್ ವಿಡಿಯೋ ಕರೆಯಲ್ಲಿ ಬಂದು ಹಣ ಕೇಳುವುದಿಲ್ಲ ಅಥವಾ ಡಿಜಿಟಲ್ ಅರೆಸ್ಟ್ ಮಾಡುವುದಿಲ್ಲ ಎಂಬ ಕಹಿ ಸತ್ಯವನ್ನು ಜನರು ಅರಿಯಬೇಕಿದೆ. ಇಂತಹ ಬೆದರಿಕೆ ಕರೆಗಳು ಬಂದಾಗ ಒಂದು ಕ್ಷಣವೂ ಭಯಪಡದೆ, ವಂಚನೆ ನಡೆದ ಕೂಡಲೇ ಅಥವಾ ‘ಗೋಲ್ಡನ್ ಅವರ್’ ಮುಗಿಯುವ ಮುನ್ನ 1930 ಸೈಬರ್ ಹೆಲ್ಪ್‌ಲೈನ್ ಗೆ ಅಥವಾ ಹತ್ತಿರದ ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದರೆ ಮಾತ್ರ ಕಳೆದುಕೊಂಡ ಹಣವನ್ನು ಮರಳಿ ಪಡೆಯಲು ಅಥವಾ ತಡೆಯಲು ಸಾಧ್ಯ ಎಂಬುದು ಪೊಲೀಸರ ಗಂಭೀರ ಎಚ್ಚರಿಕೆಯಾಗಿದೆ.

ಬಂಟ್ವಾಳ: ಮಾಜಿ ಸಚಿವ ಬಿ. ರಮಾನಾಥ ರೈ ಅವರು ಪ್ರಯಾಣಿಸುತ್ತಿದ್ದ ಕಾರು ಅಪಘಾತಕ್ಕೀಡಾದ ಘಟನೆಗೆ ಸಂಬಂಧಿಸಿದಂತೆ ಫೇಸ್‌ಬುಕ್‌ನಲ್ಲಿ ಅವಹೇಳನಕಾರಿ ಹಾಗೂ ಕೊಲೆ ಬೆದರಿಕೆಯ ರೀತಿಯ ಸಂದೇಶ ಪ್ರಕಟಿಸಿದ ಆರೋಪದಡಿ ಪ್ರಭಾಕರ ಹೆಗ್ಡೆ ಎಂಬವರ ವಿರುದ್ಧ ಬಂಟ್ವಾಳ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಬಂಟ್ವಾಳ ನಗರ ಠಾಣೆ ಅ.ಕ್ರ. 130/2026ರಂತೆ ಭಾರತೀಯ ನ್ಯಾಯ ಸಂಹಿತೆ (ಬಿಎನ್ಎಸ್) ಕಲಂ 351(2), 352ರಡಿ ಪ್ರಕರಣ ದಾಖಲಾಗಿದ್ದು, ಬಂಟ್ವಾಳ ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಬೇಬಿ ಕುಂದಾರ್ ಅವರು ನೀಡಿದ ದೂರಿನ ಮೇರೆಗೆ ಕ್ರಮ ಕೈಗೊಳ್ಳಲಾಗಿದೆ. ಮಾನ್ಯ ನ್ಯಾಯಾಲಯದ ಡಿಸ್ ನಂ. 845/2026ಕ್ಕೆ ಸಂಬಂಧಿಸಿದಂತೆ ಎಂ.ಪಿ.ಸಿ. 2319ರ ಮೂಲಕ ಬಂದ ದೂರನ್ನು ಸ್ವೀಕರಿಸಿದ ಬಳಿಕ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಘಟನೆ ಏನು?
ಸೆ.20ರಂದು ಕಾರ್ಕಳ ರಾಷ್ಟ್ರೀಯ ಹೆದ್ದಾರಿ 169ರ ಸಾಣೂರು ಶ್ರೀರಾಮ ಮಂದಿರದ ಡಿವೈಡರ್ ಕ್ರಾಸ್ ಬಳಿ ರಮಾನಾಥ ರೈ ಅವರು ಪ್ರಯಾಣಿಸುತ್ತಿದ್ದ ಕಾರು ಮತ್ತು ಬಸ್ ನಡುವೆ ಡಿಕ್ಕಿ ಸಂಭವಿಸಿತ್ತು. ಘಟನೆಯಲ್ಲಿ ರಮಾನಾಥ ರೈ ಸೇರಿದಂತೆ ಅವರ ಆಪ್ತ ಸಹಾಯಕ, ಅಂಗರಕ್ಷಕ ಹಾಗೂ ಕಾರು ಚಾಲಕರಿಗೆ ಗಂಭೀರ ಗಾಯಗಳಾಗಿದ್ದು, ಮಂಗಳೂರಿನ ಯೆನೆಪೋಯ ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅವರ ಆರೋಗ್ಯದ ಬಗ್ಗೆ ಪಕ್ಷಭೇದ ಮರೆತು ಅಭಿಮಾನಿಗಳು, ಕಾರ್ಯಕರ್ತರು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.

ಈ ಅಪಘಾತದ ಸುದ್ದಿಯೊಂದನ್ನು ಸಾಮಾಜಿಕ ಜಾಲತಾಣ ಫೇಸ್‌ಬುಕ್‌ನಲ್ಲಿ ವ್ಯಕ್ತಿಯೊಬ್ಬರು ಪೋಸ್ಟ್ ಮಾಡಿದ್ದರು. ಈ ಪೋಸ್ಟ್‌ಗೆ ಕಾಮೆಂಟ್ ಮಾಡಿರುವ ಪ್ರಭಾಕರ ಹೆಗ್ಡೆ ಎಂಬವರು ಅತ್ಯಂತ ನಿಂದನಾತ್ಮಕ ಹಾಗೂ ಬೆದರಿಕೆ ಭಾಷೆ ಬಳಸಿ “ಮಾಡಿಧನ್ನು ಮಾರಾಯ, ರಾಮನನ್ನ ತೆಗಲಿದ ಈ ಕಾಂಗ್ರೆಸ್ ಜಿಹಾದಿ ಗೆ ಇದು ಒಂದು ರಾಮನ ಮುಂಜಾಗ್ರತೆ ಇಂಜೆಕ್ಷನ್.. ಮುಂದೆ ನೋಡು ಸೂ*ಮಗನೇ… ನಿನ್ನ ಗತಿ…!!!!”** ಎಂದು ಬರೆದಿದ್ದಾರೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.

ಅಪಘಾತದಂತಹ ಸಂಕಷ್ಟದ ಸಂದರ್ಭದಲ್ಲಿಯೂ ಒಬ್ಬ ಹಿರಿಯ ಜನಪ್ರಿಯ ನಾಯಕನ ಸಾವನ್ನು ಬಯಸುವ ರೀತಿಯಲ್ಲಿ ಹಾಗೂ ಅಶ್ಲೀಲ ಪದ ಬಳಿಸಿ ನಿಂದಿಸಿರುವುದು ಖಂಡನೀಯ. ಈ ರೀತಿಯ ವಿಕೃತ ಮನಸ್ಸಿನ ಸೈಕೋಗಳನ್ನು ಪೊಲೀಸರು ಎಲ್ಲಿದ್ದರೂ ಹುಡುಕಿ ದೇಶದಲ್ಲಿ ಕಾನೂನೊಂದು ಇದೆ ಎಂದು ತೋರಿಸಬೇಕು ಎಂದು ಆಕ್ರೋಶ ವ್ಯಕ್ತವಾಗಿದೆ.

ಒಬ್ಬ ಜನಪ್ರಿಯ ವ್ಯಕ್ತಿ, ಹಲವು ಬಾರಿಯ ಜನಪ್ರಿಯ ಶಾಸಕ, ಸಚಿವರಿಗೆ ಈ ರೀತಿ ನಿಂದಿಸಿ, ಬೆದರಿಕೆ ಹಾಕಲು ಸಾಧ್ಯವಿದ್ದರೆ, ಸಾಮಾನ್ಯ ಜನರ ಪಾಡೇನು? ಎಂದು ದೂರಿನಲ್ಲಿ ಪ್ರಶ್ನಿಸಲಾಗಿದ್ದು, ಸೂಕ್ತ ಕಾನೂನು ಕ್ರಮ ಕೈಗೊಳ್ಳುವಂತೆ ಮನವಿ ಮಾಡಲಾಗಿದೆ. ಬಂಟ್ವಾಳ ನಗರ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ