ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿಯ ಬಹುಚರ್ಚಿತ ಸೌಜನ್ಯಾ ಅತ್ಯಾಚಾರ ಮತ್ತು ಕೊಲೆ ಪ್ರಕರಣದ ಮರುತನಿಖೆಗೆ ಸುಪ್ರೀಂ ಕೋರ್ಟ್ ಇತ್ತೀಚೆಗೆ ಆದೇಶ ನೀಡಿದ ಬೆನ್ನಲ್ಲೇ, ಪ್ರಕರಣದ ದಿಕ್ಕು ತಪ್ಪಿಸುವ ಹಾಗೂ ಸಾಕ್ಷಿಗಳ ಮೇಲೆ ಒತ್ತಡ ಹೇರುವ ಗಂಭೀರ ಯತ್ನಗಳು ನಡೆದಿವೆ ಎಂದು ಆರೋಪಿಸಿ ಸಂತ್ರಸ್ತೆಯ ತಾಯಿ ಕುಸುಮಾವತಿ ಗೌಡ ಅವರು ಧರ್ಮಸ್ಥಳ ಪೊಲೀಸ್ ಠಾಣೆಯಲ್ಲಿ ಹೊಸದಾಗಿ ದೂರು ದಾಖಲಿಸಿದ್ದಾರೆ.

ಅಕ್ಟೋಬರ್ 17, 2026 ರ ರಾತ್ರಿ 9 ಗಂಟೆಗೆ ಧರ್ಮಸ್ಥಳ ಪೊಲೀಸ್ ಠಾಣೆಯಲ್ಲಿ ಈ ದೂರು ಸ್ವೀಕೃತಗೊಂಡಿದ್ದು (ಪಿಟಿಷನ್ ನಂಬರ್: 351/2026, GSC No: PO2142260600352), ಬೆಂಗಳೂರಿನ ಹೈಕೋರ್ಟ್ ವಕೀಲರಾದ ಎನ್.ಪಿ. ಅಮೃತೇಶ್ ಅವರನ್ನು ಈ ದೂರಿನಲ್ಲಿ ಪ್ರತಿವಾದಿಯನ್ನಾಗಿ ಹೆಸರಿಸಲಾಗಿದೆ. ಕುಸುಮಾವತಿ ಅವರ ಪರ ವಕೀಲರಾದ ವಿಜಯ ವಾಸು ಪೂಜಾರಿ ಅವರ ಮಾರ್ಗದರ್ಶನದಲ್ಲಿ ಈ ಕಾನೂನು ಸಮರ ಆರಂಭವಾಗಿದೆ.

ಏನಿದು ವಿವಾದ? – ಹಿನ್ನೆಲೆ ಏನು?

ಸುಪ್ರೀಂ ಕೋರ್ಟ್ ಮರುತನಿಖಾ ಆದೇಶ: ಸುಪ್ರೀಂ ಕೋರ್ಟ್ ತನ್ನ ತೀರ್ಪಿನಲ್ಲಿ (Kusumavati Gowda v. Government of Karnataka & Ors.) ಬೆಳ್ತಂಗಡಿ ಪೊಲೀಸ್ ಠಾಣೆಯ ಅಪರಾಧ ಸಂಖ್ಯೆ 250/2012 (ನಂತರ ಸಿಬಿಐ ವಶದಲ್ಲಿದ್ದ RC.2(S)/2014/CBI/SCB/Chennai) ಪ್ರಕರಣದ ಡಿ ನೋವೋ (De novo – ಮರುತನಿಖೆ) ನಡೆಸಲು ಕಟ್ಟುನಿಟ್ಟಿನ ಆದೇಶ ನೀಡಿ, ಕೇವಲ 3 ತಿಂಗಳ ಗಡುವು ವಿಧಿಸಿತ್ತು.

SIT ರಚನೆ ಮತ್ತು ಕಾರ್ಯಾರಂಭ: ಸರ್ಕಾರದ ಅಧಿಸೂಚನೆಯಂತೆ ವಿಶೇಷ ತನಿಖಾ ತಂಡ (SIT) ರಚನೆಯಾಗಿ, 2026ರ ಅಕ್ಟೋಬರ್ 1 ರಿಂದ ಮಂಗಳೂರಿನಲ್ಲಿ ಅಧಿಕೃತವಾಗಿ ಕಾರ್ಯಾರಂಭ ಮಾಡಿದೆ. BNSS ಸೆಕ್ಷನ್ 2(1)(u) ಅಡಿಯಲ್ಲಿ SIT ಕಚೇರಿಯನ್ನು ಪೊಲೀಸ್ ಠಾಣೆಯೆಂದೇ ಘೋಷಿಸಲಾಗಿದೆ.

ಅಕ್ಟೋಬರ್ 13ರ ವಿವಾದಾತ್ಮಕ ಸುದ್ದಿಗೋಷ್ಠಿ ಮತ್ತು ಪ್ರಮುಖ ಆರೋಪಗಳು

SIT ತನಿಖೆ ಆರಂಭಿಸಿ ಕೇವಲ 22 ದಿನಗಳು ಕಳೆದಿರುವಾಗ, ಅಂದರೆ ಅಕ್ಟೋಬರ್ 13, 2026 ರಂದು ಬೆಂಗಳೂರಿನಲ್ಲಿ ವಕೀಲ ಎನ್.ಪಿ. ಅಮೃತೇಶ್ ಅವರು ಮತ್ತೊಬ್ಬ ವಕೀಲರಾದ ಸದಾನಂದ ಗೌಡ ಅವರೊಂದಿಗೆ ಪತ್ರಿಕಾಗೋಷ್ಠಿ ನಡೆಸಿದ್ದರು. ಈ ಸುದ್ದಿಗೋಷ್ಠಿಯ ವಿಡಿಯೋ ಹಾಗೂ ಮಾಧ್ಯಮ ವರದಿಗಳ (Public TV, News18 Kannada) ಆಧಾರದ ಮೇಲೆ ದೂರಿನಲ್ಲಿ ಮೂರು ಪ್ರಮುಖ ಅಂಶಗಳನ್ನು ಖಂಡಿಸಲಾಗಿದೆ:

ಕುಟುಂಬದ ಮೇಲೆ ಹಣದ ಆರೋಪ: ಸೌಜನ್ಯಾ ಪೋಷಕರು ತಮ್ಮ ಮಗಳ ಮರಣದಿಂದ ಹಣ ಮಾಡಿಕೊಂಡಿದ್ದಾರೆ ಎಂದು ಗಂಭೀರ ಮತ್ತು ಆಧಾರರಹಿತ ಆರೋಪ ಮಾಡಲಾಯಿತು.

ತನಿಖೆಯ ವಿಫಲತೆಯ ಬಿಂಬನೆ: SIT ತನಿಖೆಯಿಂದ ಯಾವುದೇ ತಾರ್ಕಿಕ ಅಂತ್ಯ ಅಥವಾ ಫಲಿತಾಂಶ ಮೂರು ತಿಂಗಳಲ್ಲಿ ಸಿಗಲು ಸಾಧ್ಯವಿಲ್ಲ ಹಾಗೂ 14 ವರ್ಷ ಹಳೆಯ ಸಾಕ್ಷ್ಯಗಳು ಈಗ ಲಭ್ಯವಿಲ್ಲ ಎಂದು ತನಿಖೆಯ ನೈತಿಕತೆಯನ್ನು ಕುಗ್ಗಿಸುವ ಯತ್ನ ನಡೆಸಲಾಯಿತು.

ಮರುತನಿಖೆಗೆ ವಿರೋಧಾಭಾಸದ ಬೇಡಿಕೆ: ಈಗಾಗಲೇ ಕಾನೂನುಬದ್ಧವಾಗಿ ಖುಲಾಸೆಗೊಂಡಿರುವ ಸಂತೋಷ್ ರಾವ್ ಅವರನ್ನು ಮತ್ತೊಮ್ಮೆ ಮರುತನಿಖೆಗೆ ಒಳಪಡಿಸಬೇಕು ಎಂದು ಸಾರ್ವಜನಿಕವಾಗಿ ಆಗ್ರಹಿಸಲಾಯಿತು.

ಕುಸುಮಾವತಿ ಅವರ ಆತಂಕ ಮತ್ತು ಸಾಕ್ಷಿಗಳ ಮೇಲೆ ಹೇರುತ್ತಿರುವ ಒತ್ತಡ

ವಕೀಲ ವಿಜಯ ವಾಸು ಪೂಜಾರಿ ಅವರ ಮೂಲಕ ಸಲ್ಲಿಸಲಾದ ದೂರಿನಲ್ಲಿ, ಈ ಹೇಳಿಕೆಗಳನ್ನು ಕೇವಲ ಸಾಮಾನ್ಯ ಟೀಕೆಗಳೆಂದು ಪರಿಗಣಿಸಲಾಗುವುದಿಲ್ಲ; ಬದಲಿಗೆ ಇದು ಪ್ರಮುಖ ಸಾಕ್ಷಿಗಳ ಮೇಲೆ ನೇರ ಹಾಗೂ ಮಾನಸಿಕ ಬೆದರಿಕೆ ಎಂದು ವಾದಿಸಲಾಗಿದೆ:

ಟೈಮಿಂಗ್ (ಸಮಯ): SIT ಮುಖ್ಯಸ್ಥರು ಮಂಗಳೂರಿನಲ್ಲಿ ಪ್ರಮುಖ ಪರಿಶೀಲನಾ ಸಭೆ (Review Meeting) ನಡೆಸಿದ ದಿನದಂದೇ ಈ ಹೇಳಿಕೆಗಳು ಹೊರಬಂದಿರುವುದು ತನಿಖೆಯ ದಿಕ್ಕು ತಪ್ಪಿಸುವ ಹುನ್ನಾರವಾಗಿದೆ.

ಸಂತ್ರಸ್ತೆಯ ಕುಟುಂಬವೇ ಪ್ರಮುಖ ಸಾಕ್ಷಿಗಳು: ಸಂತ್ರಸ್ತೆಯನ್ನು ಕೊನೆಯದಾಗಿ ಜೀವಂತವಾಗಿ ಕಂಡವರು ಆಕೆಯ ಮಾವ ಮತ್ತು ಅತ್ತೆ. FIR ದಾಖಲಿಸಲು ಕಾರಣರಾದವರು ಚಿಕ್ಕಪ್ಪ ಜಗದೀಶ್ ಗೌಡ ಹಾಗೂ ತಂದೆಯೇ ಪ್ರಮುಖ ಸಾಕ್ಷಿ (PW-1). ಇಂತಹ ಕುಟುಂಬವನ್ನು ‘ಲಾಭಕೋರರು’ ಎಂದು ಬಿಂಬಿಸುವುದು, ನ್ಯಾಯಕ್ಕಾಗಿ ಮುಂದೆ ಬರುವ ಸಾಕ್ಷಿಗಳನ್ನು ಮೊದಲೇ ಹತ್ತಿಕ್ಕುವ ಕುತಂತ್ರವಾಗಿದೆ.

ಸಾಕ್ಷಿಗಳಿಗೆ ಎಚ್ಚರಿಕೆ ಸಂದೇಶ: ಸುಪ್ರೀಂ ಕೋರ್ಟ್ ತನ್ನ ತೀರ್ಪಿನಲ್ಲಿ ಹಿಂದಿನ ಏಜೆನ್ಸಿಗಳು ಪ್ರಮುಖ ಸಾಕ್ಷಿಗಳ ಹೇಳಿಕೆಗಳನ್ನು ನಿರ್ಲಕ್ಷಿಸಿರುವುದನ್ನು ಗಂಭೀರವಾಗಿ ಪರಿಗಣಿಸಿತ್ತು (ಪ್ಯಾರಾ 44). ಹೊಸ ರಕ್ಷಣೆಯ ಆದೇಶದಡಿ 8 ಸಂಭಾವ್ಯ ಸಾಕ್ಷಿಗಳನ್ನು ಪತ್ತೆಹಚ್ಚಲಾಗಿದೆ (ಕ್ರಮ ಸಂಖ್ಯೆ 12 ರಿಂದ 19). ಆದರೆ ಈ ಪತ್ರಿಕಾಗೋಷ್ಠಿಗಳ ಮೂಲಕ “ಕುಟುಂಬದ ಪರ ನಿಂತವರನ್ನು ಹಣ ಮಾಡುವ ಗ್ಯಾಂಗ್ ಎಂದು ಕರೆಯಲಾಗುತ್ತದೆ” ಎಂಬ ಭಯಾನಕ ಸಂದೇಶವನ್ನು ಸಮಾಜಕ್ಕೆ ಹಾಗೂ ಸಾಕ್ಷಿಗಳಿಗೆ ನೀಡಲಾಗುತ್ತಿದೆ.

ನ್ಯಾಯಾಲಯದ ಆದೇಶದ ಉಲ್ಲಂಘನೆ: ಸಂತೋಷ್ ರಾವ್ ವಿಚಾರಣೆಯಿಂದ ಖುಲಾಸೆಗೊಂಡಿದ್ದು, ಸಂವಿಧಾನದ ವಿಧಿ 20(2)ರಡಿ ರಕ್ಷಣೆ ಹೊಂದಿದ್ದಾರೆ. ಅವರನ್ನು ಮರುತನಿಖೆ ಮಾಡಬಾರದು ಎಂದು ಸುಪ್ರೀಂ ಕೋರ್ಟ್ ಆದೇಶ ಸ್ಪಷ್ಟಪಡಿಸಿದ್ದರೂ, ಇದಕ್ಕೆ ವಿರುದ್ಧವಾದ ಅಜೆಂಡಾವನ್ನು ಬಿತ್ತಲಾಗುತ್ತಿದೆ.

ಸುರಕ್ಷತಾ ಆತಂಕ ಮತ್ತು ಹಿನ್ನೆಲೆ ದಾಖಲೆಗಳು

ಸಾಕ್ಷಿಗಳ ಜೀವಕ್ಕೆ ಅಪಾಯ: ಈ ಪ್ರಕರಣದಲ್ಲಿ ಈಗಾಗಲೇ ಪ್ರಮುಖ ಸಾಕ್ಷಿಯಾದ ರವಿ ಪೂಜಾರಿ ಎಂಬುವವರು ಕೊಲೆಯಾಗಿದ್ದಾರೆಂಬುದನ್ನು (ಸೆಷನ್ಸ್ ಕೋರ್ಟ್ ಆದೇಶ 07.02.2017) ಸಿಬಿಐ ಗಮನಿಸಿರಲಿಲ್ಲ ಎಂಬ ಅಂಶವನ್ನು ಸ್ಮರಿಸಲಾಗಿದೆ. ಅಲ್ಲದೆ, “ನಿಜವಾದ ಅಪರಾಧಿಗಳು ತನಿಖೆಯನ್ನು ತಿರುಚುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ” ಎಂದು ಸುಪ್ರೀಂ ಕೋರ್ಟ್ ತನ್ನ ತೀರ್ಪಿನ ಪ್ಯಾರಾ 59ರಲ್ಲಿ ಎಚ್ಚರಿಸಿದೆ.

ಪ್ರತಿವಾದಿಯ ಹಿನ್ನೆಲೆ: ದೂರಿನಲ್ಲಿ ಉಲ್ಲೇಖಿಸಿರುವಂತೆ, ವಕೀಲ ಎನ್.ಪಿ. ಅಮೃತೇಶ್ ಅವರು ಈಗಾಗಲೇ ಸಿ.ಸಿ. ನಂ. 20735/2013 (ಬೆಂಗಳೂರು ಹೈಗ್ರೌಂಡ್ಸ್ ಪೊಲೀಸ್ ಠಾಣೆ ಅಪರಾಧ ಸಂಖ್ಯೆ 218/2013) ಪ್ರಕರಣದಲ್ಲಿ 7ನೇ ಆರೋಪಿಯಾಗಿದ್ದು, ಸುಳ್ಳು ಕಥೆ ಕಟ್ಟಿ ಬೆದರಿಕೆ ಹಾಕಿದ ಆರೋಪಗಳನ್ನು (IPC 389, 193, 420, 120-B, 469, 506) ಎದುರಿಸುತ್ತಿದ್ದಾರೆ. 2014ರಲ್ಲಿ ನಿರೀಕ್ಷಣಾ ಜಾಮೀನು ಪಡೆದಾಗ “ಯಾವುದೇ ಕ್ರಿಮಿನಲ್ ಚಟುವಟಿಕೆಗಳಲ್ಲಿ ತೊಡಗಬಾರದು” ಎಂಬ ಕಠಿಣ ಷರತ್ತು ವಿಧಿಸಲಾಗಿತ್ತು.

ಕುಸುಮಾವತಿ ಅವರು SIT ಮುಂದಿಟ್ಟಿರುವ ಪ್ರಮುಖ ಬೇಡಿಕೆಗಳು

BNS ಸೆಕ್ಷನ್ 351(1) (ಕ್ರಿಮಿನಲ್ ಬೆದರಿಕೆ ಹಾಗೂ ಖ್ಯಾತಿಗೆ ಹಾನಿ ಮಾಡುವ ಯತ್ನ) ಅಡಿಯಲ್ಲಿ ದೂರು ದಾಖಲಿಸಲಾಗಿದ್ದು, ಇದು ಜಾಮೀನು ರಹಿತವಲ್ಲದ (non-cognizable) ಅಪರಾಧವಾಗಿರುವುದರಿಂದ ನೇರವಾಗಿ ಎಫ್‌ಐಆರ್ ದಾಖಲಿಸುವ ಬದಲು ಈ ಕೆಳಗಿನ ಕಾನೂನು ಕ್ರಮಗಳನ್ನು ಕೈಗೊಳ್ಳುವಂತೆ ಕೋರಲಾಗಿದೆ:

BNSS ಸೆಕ್ಷನ್ 174(1) ರಡಿ ದೂರು ಸ್ವೀಕರಿಸಿ, ದಿನಚರಿ ವರದಿಯನ್ನು ಮ್ಯಾಜಿಸ್ಟ್ರೇಟ್‌ಗೆ ಕಳುಹಿಸುವುದು.

BNSS ಸೆಕ್ಷನ್ 174(2) ರಡಿ ಮ್ಯಾಜಿಸ್ಟ್ರೇಟ್ ಅನುಮತಿ ಪಡೆದು BNS 351 ಹಾಗೂ ಇತರೆ ಸೂಕ್ತ ಸೆಕ್ಷನ್‌ಗಳಡಿ ಮರುತನಿಖೆ ನಡೆಸುತ್ತಿರುವ ಅಪರಾಧ ಸಂಖ್ಯೆ 250/2012 ರ ಜೊತೆಗೆ ಈ ಕೃತ್ಯವನ್ನೂ ಜಂಟಿಯಾಗಿ ತನಿಖೆ ನಡೆಸುವುದು.

ಕುಸುಮಾವತಿ, ಅವರ ಕುಟುಂಬ ಹಾಗೂ 8 ಸಂಭಾವ್ಯ ಸಾಕ್ಷಿಗಳಿಗೆ ತಕ್ಷಣದ ಬೆದರಿಕೆ ಮೌಲ್ಯಮಾಪನ (Threat Assessment) ನಡೆಸಿ, ‘ಸಾಕ್ಷಿ ರಕ್ಷಣಾ ಯೋಜನೆ 2018’ (Witness Protection Scheme) ಅಡಿ ದಕ್ಷಿಣ ಕನ್ನಡದ ಸಕ್ಷಮ ಪ್ರಾಧಿಕಾರಕ್ಕೆ Threat Analysis Report ಕಳುಹಿಸುವುದು.

ಎನ್.ಪಿ. ಅಮೃತೇಶ್ ಅವರ ಮೇಲಿನ ಹಿಂದಿನ ಕ್ರಿಮಿನಲ್ ಪ್ರಕರಣಗಳ ಪ್ರಾಸಿಕ್ಯೂಷನ್ ಏಜೆನ್ಸಿಗೆ ಈ ಸಂಪೂರ್ಣ ಮಾಹಿತಿಯನ್ನು ನೀಡುವುದು.

ಈ ದೂರಿನ ಪ್ರತಿಯನ್ನು ರಾಜ್ಯ ಪೊಲೀಸ್ ಮಹಾನಿರ್ದೇಶಕರು (DGP – SIT ಮೇಲ್ವಿಚಾರಣಾ ಪ್ರಾಧಿಕಾರ) ಹಾಗೂ ಬೆಂಗಳೂರು ನಗರ ಪೊಲೀಸ್ ಆಯುಕ್ತರಿಗೂ ಹೆಚ್ಚಿನ ಕ್ರಮಕ್ಕಾಗಿ ಕಳುಹಿಸಿಕೊಡಲಾಗಿದೆ. ಸದ್ಯ ಧರ್ಮಸ್ಥಳ ಠಾಣೆಯಲ್ಲಿ ಪಿಟಿಷನ್ ಸ್ವೀಕೃತವಾಗಿದ್ದು, ಮುಂದಿನ ಕ್ರಮಕ್ಕಾಗಿ SIT ಗೆ ರವಾನೆಯಾಗುವ ನಿರೀಕ್ಷೆಯಿದೆ.

ರಾಜ್ಯವನ್ನೇ ಬೆಚ್ಚಿ ಬೀಳಿಸಿದ್ದ ಸೌಜನ್ಯ ಅತ್ಯಾಚಾರ ಮತ್ತು ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಬ್ ಜುಡೀಸ್ ಆಗಿರುವ ಪ್ರಕರಣದಲ್ಲಿ ಹೈಕೋರ್ಟ್ ವಕೀಲ ಅಮೃತೇಶ್ ಅವರು ಅನಗತ್ಯವಾಗಿ ಮೂಗು ತೂರಿಸಿ ನ್ಯಾಯಾಂಗ ನಿಂದನೆ ಮಾಡಿದ್ದಾರೆ ಎಂದು ಕರಾವಳಿಯ ಜನಪರ ದೈನಿಕ ‘ಕರಾವಳಿ ಅಲೆ’ ತನ್ನ ವಿಶೇಷ ಸಂಪಾದಕೀಯದಲ್ಲಿ ತೀವ್ರವಾಗಿ ಖಂಡಿಸಿದೆ.

ಇಂದು ಪ್ರಕಟವಾದ ‘ಕರಾವಳಿ ಅಲೆ’ ದೈನಿಕದ ವಿಶೇಷ ಸಂಪಾದಕೀಯದಲ್ಲಿ ಈ ಬಗ್ಗೆ ಸ್ಪಷ್ಟವಾಗಿ ಪ್ರಸ್ತಾಪಿಸಲಾಗಿದೆ.

ಸಂಪಾದಕೀಯದಲ್ಲೇನಿದೆ?

ನ್ಯಾಯಾಂಗ ನಿಂದನೆ: ಸೌಜನ್ಯ ಪ್ರಕರಣ ನ್ಯಾಯಾಲಯದ ವಿಚಾರಣೆಯಲ್ಲಿರುವ (Sub Judice) ಸಂದರ್ಭದಲ್ಲಿ, ಪ್ರಕರಣದ ಬಗ್ಗೆ ಬಹಿರಂಗವಾಗಿ ಮಾತನಾಡುವುದು ಮತ್ತು ತೀರ್ಪಿನ ಬಗ್ಗೆ ವ್ಯಾಖ್ಯಾನ ಮಾಡುವುದು ನ್ಯಾಯಾಂಗ ನಿಂದನೆಯಾಗುತ್ತದೆ ಎಂದು ಸಂಪಾದಕೀಯ ಹೇಳಿದೆ.

ತಂದೆ-ತಾಯಿ ಬಗ್ಗೆ ಅವಹೇಳನಕಾರಿ ಹೇಳಿಕೆ: ಬೆಂಗಳೂರಿನಲ್ಲಿ ಮಾಧ್ಯಮಗಳ ಮುಂದೆ ಮಾತನಾಡಿರುವ ಹೈಕೋರ್ಟ್ ವಕೀಲ ಅಮೃತೇಶ್, “ಸೌಜನ್ಯ ತಂದೆ-ತಾಯಿ ಹಣ ಮಾಡಿದ್ದಾರೆ” ಎಂದು ಆರೋಪಿಸಿದ್ದಾರೆ. ಹಣಕ್ಕಾಗಿ ಹೋರಾಟ ಮಾಡುತ್ತಿದ್ದಾರೆ ಎಂದು ಹೇಳುವ ಮೂಲಕ ಸೌಜನ್ಯದ ತಂದೆ ಚಂದಪ್ಪ ಗೌಡ ಮತ್ತು ತಾಯಿಯ ಮಾನಹಾನಿ ಮಾಡಲು ಯತ್ನಿಸಿದ್ದಾರೆ. ಇದು ಅಕ್ಷಮ್ಯ ಎಂದು ‘ಕರಾವಳಿ ಅಲೆ’ ಆಕ್ರೋಶ ವ್ಯಕ್ತಪಡಿಸಿದೆ.

ತನಿಖೆ ಮತ್ತು ತೀರ್ಪಿನ ಬಗ್ಗೆ ಅಪನಂಬಿಕೆ ಸೃಷ್ಟಿ: ಈಗಾಗಲೇ ಸಿಬಿಐ ತನಿಖೆ ನಡೆದು, ಕೆಳ ನ್ಯಾಯಾಲಯದಲ್ಲಿ ತೀರ್ಪು ಬಂದಿರುವ ಪ್ರಕರಣದಲ್ಲಿ, ಮತ್ತೆ ಸುಪ್ರೀಂ ಕೋರ್ಟಿನಲ್ಲಿ ಮೇಲ್ಮನವಿ ಇರುವಾಗ ಇಂತಹ ಹೇಳಿಕೆ ನೀಡುವುದು ಸಾರ್ವಜನಿಕರಲ್ಲಿ ನ್ಯಾಯಾಂಗದ ಬಗ್ಗೆ ಗೊಂದಲ ಮತ್ತು ಅಪನಂಬಿಕೆ ಸೃಷ್ಟಿಸುವ ಪ್ರಯತ್ನವಾಗಿದೆ ಎಂದು ಸಂಪಾದಕೀಯ ಅಭಿಪ್ರಾಯಪಟ್ಟಿದೆ.

“ಸಂತ್ರಸ್ತೆಯ ಹೆತ್ತವರ ಗಂಭೀರ ದೂರು ಇರುವಾಗ, ಕಾನೂನಿನ ಚೌಕಟ್ಟಿನಲ್ಲಿ ಹೋರಾಟ ಮಾಡುವುದನ್ನು ತಡೆಯುವ ಉದ್ದೇಶದಿಂದ ಇಂತಹ ಹೇಳಿಕೆಗಳನ್ನು ನೀಡುವುದು ನ್ಯಾಯಾಲಯದ ಮೇಲಿನ ಸೂಕ್ಷ್ಮ ವಿಚಾರದ ಕುರಿತು ಮಾತನಾಡಿದಂತೆ ಮತ್ತು ಅದರ ಅಡಿಯಲ್ಲಿ ತನಿಖೆ ನಡೆಸುವ ವ್ಯವಸ್ಥೆಯನ್ನು ಬುಡಮೇಲು ಮಾಡುವ ಪ್ರಯತ್ನವಾಗಿದೆ” ಎಂದು ‘ಕರಾವಳಿ ಅಲೆ’ ಸಂಪಾದಕೀಯದಲ್ಲಿ ಉಲ್ಲೇಖಿಸಲಾಗಿದೆ.

ಸೌಜನ್ಯ ಪ್ರಕರಣದಲ್ಲಿ ನ್ಯಾಯಕ್ಕಾಗಿ ಹೋರಾಡುತ್ತಿರುವ ಕುಟುಂಬಕ್ಕೆ ನೈತಿಕ ಧೈರ್ಯ ತುಂಬುವ ಬದಲು, ಇಂತಹ ಹೇಳಿಕೆಗಳ ಮೂಲಕ ಅವರ ಮಾನಸಿಕ ಸ್ಥೈರ್ಯವನ್ನು ಕುಗ್ಗಿಸುವ ಕೆಲಸ ಮಾಡಲಾಗುತ್ತಿದೆ ಎಂದು ಸಂಪಾದಕೀಯದಲ್ಲಿ ಹೇಳಲಾಗಿದೆ.

ಸೂಚನೆ: ಈ ಸುದ್ದಿಯನ್ನು ಕರಾವಳಿ ಅಲೆ ದೈನಿಕದ ದಿನಾಂಕ 13-10-2026 ರ ವಿಶೇಷ ಸಂಪಾದಕೀಯವನ್ನು ಆಧರಿಸಿ ಪ್ರಕಟಿಸಲಾಗಿದೆ

ಬೆಳ್ತಂಗಡಿ: ಧರ್ಮಸ್ಥಳದ ಕುಮಾರಿ ಸೌಜನ್ಯ ಅತ್ಯಾಚಾರ ಮತ್ತು ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುಪ್ರೀಂ ಕೋರ್ಟ್ ಮರುತನಿಖೆಗೆ ಆದೇಶ ನೀಡಿರುವ ಬೆನ್ನಲ್ಲೇ, ಹೋರಾಟದ ವೇದಿಕೆ ಮತ್ತಷ್ಟು ಬಲಗೊಳ್ಳುತ್ತಿದೆ. ಇದರ ಭಾಗವಾಗಿ, ಸಂಘ ಪರಿವಾರದ ಪ್ರಮುಖ ಹಾಗೂ ಮಾಜಿ ಬಿಜೆಪಿ ಜಿಲ್ಲಾ ಕಾರ್ಯದರ್ಶಿ ಕೃಷ್ಣಪ್ಪ ಪೂಜಾರಿ ಕಲ್ಲಡ್ಕ ಮತ್ತು ಹಿಂದೂ ಸಮಾಜದ ಹೋರಾಟಗಾರ ಹಾಗೂ ಹಿಂದೂ ಜಾಗರಣ ವೇದಿಕೆಯಲ್ಲಿ ಮುಂಚೂಣಿಯಲ್ಲಿದ್ದ ಕಾವೂರಿನ ಟಿಕ್ಕಿ ರವಿ ಅವರು ಬುಧವಾರ (ಅಕ್ಟೋಬರ್ 07) ಸೌಜನ್ಯ ಅವರ ಮನೆ ಹಾಗೂ ಹೋರಾಟಗಾರ ಮಹೇಶ್ ಶೆಟ್ಟಿ ತಿಮರೋಡಿ ಅವರ ಮನೆಗೆ ದಿಢೀರ್ ಭೇಟಿ ನೀಡಿ, ಸೌಜನ್ಯ ನ್ಯಾಯದ ಹೋರಾಟಕ್ಕೆ ಸಂಪೂರ್ಣ ಬೆಂಬಲ ಘೋಷಿಸಿದ್ದಾರೆ.

ಸೌಜನ್ಯ ಮನೆ ಹಾಗೂ ಆರಾಧನಾ ಸ್ಥಳಕ್ಕೆ ಭೇಟಿ

ಬೆಳಗ್ಗೆ ಧರ್ಮಸ್ಥಳದಲ್ಲಿ ದುಷ್ಟರ ಅಟ್ಟಹಾಸಕ್ಕೆ ಬಲಿಯಾದ ಸೌಜನ್ಯಾಳ (Soujanya Case) ಸಮಾಧಿ ಸ್ಥಳ ಹಾಗೂ ಸೌಜನ್ಯ ಶಕ್ತಿಯ ಆರಾಧನಾ ಸಾನಿಧ್ಯಕ್ಕೆ ಭೇಟಿ ನೀಡಿದ ಕಲ್ಲಡ್ಕ ಕೃಷ್ಣಪ್ಪ ಪೂಜಾರಿ ಹಾಗೂ ಟಿಕ್ಕಿ ರವಿ ಅವರು, 14 ವರ್ಷಗಳ ಹಿಂದೆ ಕ್ರೂರತ್ಯಾಗಕ್ಕೊಳಗಾದ ಸೌಜನ್ಯಳ ಪ್ರತಿಮೆಗೆ ಪ್ರಾರ್ಥಿಸಿ ನಮನ ಸಲ್ಲಿಸಿದರು. ಬಳಿಕ ಸೌಜನ್ಯ ಅವರ ಮನೆಗೆ ತೆರಳಿ ತಾಯಿ ಕುಸುಮಾವತಿ ಅವರನ್ನು ಭೇಟಿ ಮಾಡಿ ಸುದೀರ್ಘ ಚರ್ಚೆ ನಡೆಸಿದರು. “ನಿಮ್ಮ ಹಾಗೂ ನಮ್ಮೆಲ್ಲರ ಮಗಳು ಸೌಜನ್ಯ ಶಕ್ತಿ ಸ್ವರೂಪಿಣಿಯಾಗಿದ್ದು, ಸೌಜನ್ಯಗೆ ಮಾತ್ರವಲ್ಲದೆ ಈ ಪ್ರದೇಶದಲ್ಲಿ ಅಸ್ವಾಭಾವಿಕವಾಗಿ ಮೃತಪಟ್ಟ ಎಲ್ಲರಿಗೂ ನ್ಯಾಯ ಸಿಗುವವರೆಗೆ ನಮ್ಮ ಧ್ವನಿ ನಿಮ್ಮೊಂದಿಗೆ ಇರಲಿದೆ” ಎಂದು ಅವರು ಭರವಸೆ ನೀಡಿದರು. ನಂತರ ಶ್ರೀಕ್ಷೇತ್ರ ಧರ್ಮಸ್ಥಳದ ಅಣ್ಣಪ್ಪ ಸ್ವಾಮಿಯ ಸಾನಿಧ್ಯಕ್ಕೆ ತೆರಳಿ ಸೌಜನ್ಯಳಿಗೆ ಹಾಗೂ ಇತರ ಅಸ್ವಾಭಾವಿಕವಾಗಿ ಸಾವಿಗೀಡಾದವರಿಗೆ ಹೆಸರೇ ಸೂಚಿಸುವ ಈ ಧರ್ಮದ ಸ್ಥಳದಲ್ಲಿ ಆದಷ್ಟು ಬೇಗ ನ್ಯಾಯ ಒದಗಿಸುವಂತೆ ಪ್ರಾರ್ಥಿಸಿದರು.

ಮಹೇಶ್ ಶೆಟ್ಟಿ ತಿಮರೋಡಿ ಮನೆಗೆ ಭೇಟಿ ಮತ್ತು ಬೆಂಬಲ

ಕಳೆದ 14 ವರ್ಷಗಳಿಂದ ಜೀವಭಯ, ಮಾನಹಾನಿ. ಬಂಧನ, ಗಡಿಪಾರು ಹಾಗೂ ವಿವಿಧ ಮೊಕದ್ದಮೆಗಳನ್ನು ಲೆಕ್ಕಿಸದೆ ಸೌಜನ್ಯಗಾಗಿ ನಿರಂತರ ಹೋರಾಟ ನಡೆಸುತ್ತ ಬಂದಿರುವ ಪ್ರಮುಖ ಸಾಮಾಜಿಕ ನೇತಾರ, ಧಾರ್ಮಿಕ ಸೇನಾನಿ ಮಹೇಶ್ ಶೆಟ್ಟಿ ತಿಮರೋಡಿ ಅವರ ಮನೆಗೆ ನಾಯಕರು ಭೇಟಿ ನೀಡಿದರು. ಸಮಾಜದಲ್ಲಿ ಅನ್ಯಾಯಗಳ ವಿರುದ್ಧ ಮೌನವಹಿಸುವವರ ಧೋರಣೆ ಹಾಗೂ ಪ್ರಸ್ತುತ ಬೆಳವಣಿಗೆಗಳ ಕುರಿತು ಸುದೀರ್ಘ ಮಾತುಕತೆ ನಡೆಸಲಾಯಿತು. ಮುಂದಿನ ದಿನಗಳಲ್ಲಿ ಮಹೇಶ್ ಶೆಟ್ಟಿ ತಿಮರೋಡಿ ಅವರ ನೇತೃತ್ವದ ಹೋರಾಟವನ್ನು ತಾರ್ಕಿಕ ಅಂತ್ಯದವರೆಗೆ ಕೊಂಡೊಯ್ಯಲು ಸಂಪೂರ್ಣ ಬೆಂಬಲ ನೀಡುವುದಾಗಿ ಘೋಷಿಸಿದ ಅವರು, ಅಕ್ಟೋಬರ್ 10ರಂದು ನಡೆಯಲಿರುವ ‘ನ್ಯಾಯದ ನಡಿಗೆ’ ಹಾಗೂ ನ್ಯಾಯವಾದಿಗಳಿಗೆ ಅಭಿನಂದನಾ ಸಭೆಯಲ್ಲಿ ಭಾಗವಹಿಸುವುದಾಗಿ ಭರವಸೆ ನೀಡಿದರು.

ಹೊಸ ರಾಜಕೀಯ ಮತ್ತು ಸಾಮಾಜಿಕ ಸಂಚಲನ

ಕೆಲ ಸಮಯಗಳ ಹಿಂದೆ ಆರ್‌ಎಸ್‌ಎಸ್ ಹಿರಿಯ ಮುಖಂಡ ಡಾ. ಪ್ರಭಾಕರ ಭಟ್ ಕಲ್ಲಡ್ಕ ಅವರು ಸೌಜನ್ಯ ಅವರ ಮನೆಗೆ ಭೇಟಿ ನೀಡಿ ಕುಟುಂಬಕ್ಕೆ ಸಾಂತ್ವನ ಹೇಳಿದ್ದು ರಾಜ್ಯಾದ್ಯಂತ ಭಾರೀ ಸಂಚಲನ ಮೂಡಿಸಿತ್ತು. ಇದರ ಬೆನ್ನಲ್ಲೇ ಸುಪ್ರೀಂ ಕೋರ್ಟ್ ಮರುತನಿಖೆಗೆ ಆದೇಶ ನೀಡಿತ್ತು. ಇದೀಗ ಡಾ. ಪ್ರಭಾಕರ ಭಟ್ ಅವರ ಆಪ್ತ ವಲಯದ ಕೃಷ್ಣಪ್ಪ ಪೂಜಾರಿ ಕಲ್ಲಡ್ಕ ಮತ್ತು ಹಿಂದೂ ಹೋರಾಟಗಾರ ಟಿಕ್ಕಿ ರವಿ ಅವರು ಸೌಜನ್ಯ ಹೋರಾಟಕ್ಕೆ ಬಹಿರಂಗವಾಗಿ ಧುಮುಕಿರುವುದು ಹಾಗೂ ಇತರ ಹಿಂದೂ ನಾಯಕರು ಕೈಜೋಡಿಸಲು ಮುಂದಾಗಿರುವುದು ಪ್ರಕರಣಕ್ಕೆ ಹೊಸ ಆಯಾಮವನ್ನು ತಂದುಕೊಟ್ಟಿದೆ. ಮುಂಬರುವ ದಿನಗಳಲ್ಲಿ ಸರಕಾರದ ತನಿಖೆ, ನ್ಯಾಯಾಂಗದ ಆದೇಶ, ಸಾರ್ವಜನಿಕ ಹೋರಾಟ ಯಾವ ರೀತಿಯ ಮಹತ್ವದ ತಿರುವುಗಳನ್ನು ಪಡೆದುಕೊಳ್ಳಲಿದೆ ಎಂಬುದು ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.