ಬಂಟ್ವಾಳ ತಾಲೂಕಿನ ಪಾಣೆಮಂಗಳೂರು ಗ್ರಾಮದ ಬೊಂಡಾಳ ಸೇನೆರೆಬೈಲು ಎಂಬಲ್ಲಿ ಅನಾದಿ ಕಾಲದಿಂದಲೂ ಆರಾಧಿಸಿಕೊಂಡು ಬರುತ್ತಿದ್ದ ಪವಿತ್ರ ನಾಗಬನ ಹಾಗೂ ರಕ್ತೇಶ್ವರೀ ದೈವದ ಸಾನಿಧ್ಯವನ್ನು ಕಮರ್ಷಿಯಲ್ ಯೋಜನೆಗಳಿಗಾಗಿ ಧ್ವಂಸಗೊಳಿಸಿರುವ ಘಟನೆ ಭಕ್ತಾದಿಗಳ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಈ ಅನ್ಯಾಯದ ವಿರುದ್ಧ ಸಿಡಿದೆದ್ದಿರುವ ಬೊಳ್ಳೆಮಾರ್ ಬಿಲ್ಲವ ಕಿರೋಡಿಯನ್ ಕುಟುಂಬಸ್ಥರು ಹಾಗೂ ಸ್ಥಳೀಯ ಭಕ್ತರು, ದೈವಜ್ಞರ ಸೂಚನೆಯಂತೆ ಆ ಪ್ರದೇಶದಲ್ಲಿಯೇ ಪರ್ಯಾಯ ಜಾಗದಲ್ಲಿ ನಾಗದೇವರ ಚರಪ್ರತಿಷ್ಠೆಯನ್ನು ನೆರವೇರಿಸಿದ್ದಾರೆ. “ಸತ್ಯ ಶ್ರೀಮಂತಿಕೆಯ ಮುಂದೆ ಸೋಲಬಹುದು, ಆದರೆ ಸಾಯುವುದಿಲ್ಲ” ಎಂದು ನಂಬಿರುವ ಭಕ್ತ ಸಮೂಹ, ಮೂಲ ಸ್ಥಳದಲ್ಲಿಯೇ ನಾಗಪ್ರತಿಷ್ಠೆ ನಡೆಯುವವರೆಗೆ ನಾಗನಿಗೆ ಒದಗಿಬಂದಿರುವ ಸಂಕಷ್ಟವನ್ನು ಒಂದು ಮಹಾನ್‌ ತಪಸ್ಸಿನಂತೆ ಸ್ವೀಕರಿಸಿ ನಮ್ಮ ಸಂಕಲ್ಪ ಈಡೇರುವ ತನಕ ಗ್ರಾಮದ ಮತ್ತು ತರವಾಡಿನ ದೈವದೇವರು ಮತ್ತು ಅಷ್ಟಕುಲ ನಾಗದೇವರಿಗೆ ಪ್ರತಿನಿತ್ಯ ಪ್ರಾರ್ಥಿಸಿ ಆ ಶುಭಘಳಿಗೆಗಾಗಿ ಬೇಡಿಕೊಳ್ಳುತ್ತೇವೆ ಎಂದು ತಿಳಿಸಿದ್ದಾರೆ.

ಘಟನೆಯ ಹಿನ್ನೆಲೆ:
ಬೊಂಡಾಳ ಸೇನೆರೆಬೈಲಿನಲ್ಲಿ ನೂರಾರು ಕುಟುಂಬಗಳ ಆರಾಧ್ಯ ಸಾನಿಧ್ಯವಾಗಿದ್ದ ನಾಗಬನ ಮತ್ತು ರಕ್ತೇಶ್ವರೀ ಕಟ್ಟೆಯನ್ನು ಭೂಮಿ ಖರೀದಿದಾರರಾದ ಸತೀಶ್ ಕುಮಾರ್ ಅವರು, ಪುರೋಹಿತ ಕೇಶವ ಅಶಾಂತಿ ಎಂಬವರ ಮಾರ್ಗದರ್ಶನದಲ್ಲಿ ಜೆಸಿಬಿ ಬಳಸಿ ಸಂಪೂರ್ಣವಾಗಿ ನೆಲಸಮ ಮಾಡಿದ್ದಾರೆ. ಶತಮಾನಗಳ ಇತಿಹಾಸವಿರುವ ನೈಸರ್ಗಿಕ ನಾಗಬನ ಹಾಗೂ ಪವಿತ್ರ ಕೆರೆಯನ್ನು ವಾಣಿಜ್ಯ ಉದ್ದೇಶಕ್ಕಾಗಿ ನಾಶಪಡಿಸಿರುವುದು ಸಾವಿರಾರು ಭಕ್ತರ ಭಾವನೆಗಳಿಗೆ ಧಕ್ಕೆ ತಂದಿದೆ.

ಘಟನೆಯ ಹಿನ್ನೆಲೆ ಮತ್ತು ದೈವದ್ರೋಹದ ಆರೋಪ:
ಬೊಳ್ಳೆಮಾರ್ ಬಿಲ್ಲವ ಕಿರೋಡಿಯನ್ ಕುಟುಂಬಸ್ಥರು ಮತ್ತು ಭಕ್ತರು ಸೇರಿ ಸುಮಾರು 15 ಲಕ್ಷಕ್ಕೂ ಅಧಿಕ ವೆಚ್ಚದಲ್ಲಿ ಜೀರ್ಣೋದ್ಧಾರ ಮಾಡಿದ್ದ ಈ ಸಾನಿಧ್ಯವನ್ನು, ಯಾವುದೇ ಮುನ್ಸೂಚನೆ ನೀಡದೆ ರಾತ್ರೋರಾತ್ರಿ ಜೆಸಿಬಿ ಬಳಸಿ ನೆಲಸಮ ಮಾಡಲಾಗಿತ್ತು. ನಾಗಬನದಲ್ಲಿದ್ದ ಬೃಹದಾಕಾರದ ಮರಗಳನ್ನು ಅರಣ್ಯ ಇಲಾಖೆಯ ಕಣ್ಣು ತಪ್ಪಿಸಿ ಕಡಿದು ಸಾಗಿಸಲಾಗಿದೆ. ಅನ್ಯಧರ್ಮೀಯರಿಂದ ಇಂತಹ ಘಟನೆ ನಡೆದಿದ್ದರೆ ದೊಡ್ಡ ಮಟ್ಟದ ಹೋರಾಟಗಳು ನಡೆಯುತ್ತಿದ್ದವು. ಆದರೆ, ಸ್ವಧರ್ಮದವರೇ ಸಾನಿಧ್ಯಗಳನ್ನು ನಾಶಪಡಿಸುತ್ತಿದ್ದರೂ ಧರ್ಮರಕ್ಷಕರು ಹಾಗೂ ಧಾರ್ಮಿಕ ಮುಖಂಡರು ಮೌನಕ್ಕೆ ಶರಣಾಗಿರುವುದು ಸಂಶಯಕ್ಕೆ ಎಡೆಮಾಡಿಕೊಟ್ಟಿದೆ. ನೊಂದ ಕುಟುಂಬಸ್ಥರು ನ್ಯಾಯಕ್ಕಾಗಿ ಪತ್ರಿಕಾಗೋಷ್ಠಿ ನಡೆಸಿದರೂ, ಕಾನೂನು ಹೋರಾಟ ಮಾಡಿದರೂ ಯಾವುದೇ ಫಲ ಸಿಕ್ಕಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಕುಟುಂಬಸ್ಥರು ದೈವಜ್ಞರ ಮೊರೆ ಹೋಗಿದ್ದರು.

ದೈವಜ್ಞರ ಎಚ್ಚರಿಕೆ ಮತ್ತು ಪ್ರಶ್ನಾ ಚಿಂತನೆ:
ಘಟನೆಗೆ ಸಂಬಂಧಿಸಿದಂತೆ ಫೆ.15ರಂದು ನಡೆದ ಪ್ರಶ್ನಾ ಚಿಂತನೆಯಲ್ಲಿ, “ನಾಗಬನವನ್ನು ಸ್ಥಳಾಂತರಿಸುವಂತಿಲ್ಲ, ಎಲ್ಲಿ ನಾಶವಾಗಿದೆಯೋ ಅದೇ ಸ್ಥಳದಲ್ಲಿ ಪುನರ್ ಪ್ರತಿಷ್ಠೆ ನಡೆಯಬೇಕು. ಇಲ್ಲವಾದಲ್ಲಿ ಸಂಕಷ್ಟಗಳು ಎದುರಾಗಲಿವೆ” ಎಂದು ದೈವಜ್ಞರು ಎಚ್ಚರಿಸಿದ್ದರು. ಈ ಬಗ್ಗೆ ನಾನು ಮುಂದುವರಿಯುವುದಿಲ್ಲ ಎಂದು ದೈವಜ್ಞರಲ್ಲಿ ಮಾತುಕೊಟ್ಟ ಅಶಾಂತಿಯು ಮಾತು ತಪ್ಪಿಸಿದಲ್ಲದೆ, ಆತನ ನೇತೃತ್ವದಲ್ಲಿ ನಾಗನ ಶಿಲೆಗಳನ್ನು ಖರೀದಿದಾರನ ಅಣತಿಯಂತೆ ಫೆ. 27ರಂದು ನಾಗನಿಗೆ ಸಂಬಂಧಿಸದ ಜಾಗದಲ್ಲಿ ಪ್ರತಿಷ್ಠೆ ಮಾಡಲು ಮುಂದಾದ ಘಟನೆಯೂ ನಡೆದಿದೆ. ನಾಗಬನವನ್ನು ಸ್ಥಳಾಂತರಿಸಬಹುದು ಎಂದು ತಪ್ಪು ಮಾರ್ಗದರ್ಶನ ನೀಡಿದ ಪುರೋಹಿತ ಕೇಶವ ಅಶಾಂತಿ ಅವರ ನಡೆಗೆ ಭಕ್ತರು ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ. “ಸ್ವಾರ್ಥಕ್ಕಾಗಿ ಧರ್ಮನಿಷ್ಠೆಯನ್ನು ಮಾರಿಕೊಂಡ ಇಂತಹ ಮಾರ್ಗದರ್ಶಕರಿಂದಲೇ ಇಂದು ದೈವಿಕ ಶಕ್ತಿಗಳಿಗೆ ಸಂಕಷ್ಟ ಎದುರಾಗಿದೆ” ಎಂದು ಭಕ್ತರು ದೂರಿದ್ದಾರೆ. ಫೆಬ್ರವರಿ 27 ರಂದು ಸಂಜೆ ನಾಗಶಿಲೆಗಳನ್ನು ಸ್ಥಳಾಂತರಕ್ಕೆ ಯತ್ನಿಸುವ ಪ್ರಕ್ರಿಯೆಗಳು ನಡೆಯುತ್ತಿರುವಂತೆಯೇ ಪೊಲೀಸರ ಸಮ್ಮುಖದಲ್ಲೇ ಭಕ್ತರು ಅಶಾಂತಿಯನ್ನು ತರಾಟೆಗೆ ತೆಗೆದುಕೊಂಡಾಗ ನಾನು ನಿಮ್ಮ ಕುಟುಂಬಕ್ಕೆ ಸಂಬಂಧಿಸಿದ ನಾಗ ಪ್ರತಿಷ್ಠೆಯನ್ನು ಮಾಡುವುದಿಲ್ಲ, ನಾಗಶಿಲೆಗಳನ್ನು ಇಲ್ಲಿಂದ ತೆರವುಗೊಳಿಸಬೇಕೆಂದು ಹೇಳಿದ್ದರು.

ಅನಾದಿಕಾಲದ ಆರಾಧಕ ವಂಶದ ಸಹೋದರರಿಂದ ನಾಗನಿಗೆ ನೆಲೆ
ತಾವು ಅನಾದಿಕಾಲದಿಂದಲೂ ಆರಾಧಿಸಿಕೊಂಡು ಬರುತ್ತಿದ್ದ ನಾಗನ ನೆಲೆ ನಾಶವಾದಾಗ ಬೀದಿಗೆ ಬಿದ್ದು ಹೋರಾಟ ಮಾಡಿದ ಭಕ್ತರಿಗೆ ಕೊನೆಗೂ ಜಯ ಲಭಿಸಿದೆ. ಭಕ್ತರ ಆಕ್ರೋಶಕ್ಕೆ ಮಣಿದು ಕೈತಪ್ಪಿ ಹೋದ ನಾಗನ ಶಿಲೆಗಳನ್ನು ನಾಗಾರಾಧಕರಿಗೆ ನೀಡಲು ಒಪ್ಪಿಗೆ ನೀಡಿ ಗಡುವು ವಿಧಿಸಿದ್ದಾರೆ. ತಕ್ಷಣ ಎಚ್ಚೆತ್ತ ದೈವಾರಾಧಕರು ನಾಗಶಿಲೆಗಳಿಗೆ ನೆಲೆ ನೀಡುವ ಬಗ್ಗೆ ದೈವಜ್ಞರ ಮೊರೆಹೋಗಿದ್ದಾರೆ. ದೈವಜ್ಞರು ಸ್ಥಳದಲ್ಲಿ ಯಾವ ರೀತಿಯಲ್ಲಿ ಚಿಂತನೆ ನಡೆಸಿ ಈ ಹಿಂದೆ ತಿಳಿಸಿದ್ದಾರೋ ಅದೇ ರೀತಿಯಲ್ಲಿ ಮತ್ತೆ ತಿಳಿಸಿ ಆ ಪ್ರದೇಶವನ್ನು ಬಿಟ್ಟು ಹೋಗುವುದಕ್ಕೆ ನಾಗ ದೇವರು ಸಿದ್ದನಿಲ್ಲ. ಅದೇ ಪರಿಸರದಲ್ಲಿ ಹೆಚ್ಚು ದೂರವಾಗದಂತೆ ( ಸಾನಿಧ್ಯವನ್ನು ನೋಡಿಕೊಂಡಿರುವಂತೆ) ಜಾಗವನ್ನು ಹುಡುಕಿ ಎಂದು ನಿರ್ದೇಶಿಸಿದ್ದಾರೆ. ಅದರಂತೆ ತಕ್ಷಣ ಸಭೆ ಸೇರಿದ ಭಕ್ತರು ವಿಷಯವನ್ನು ಪ್ರಸ್ತಾಪಿಸಿದಾಗ ಬೊಂಡಾಳ ಜಯಶಂಕರ್‌ ಅವರ ಮುಂದಾಳುತ್ವದಲ್ಲಿ ಅನಾದಿಕಾಲದಿಂದಲೂ ಆರಾಧನೆ ಮಾಡುತ್ತಿದ್ದ ವಂಶಸ್ಥರಾದ ದಿ. ರಾಮ ಪೂಜಾರಿಯವರ ಮಕ್ಕಳಾದ ಚಿದಾನಂದ ಪೂಜಾರಿ ಮತ್ತು ಶಿವಾನಂದ ಪೂಜಾರಿಯವರು ಮುಂದೆ ಬಂದು ನಾಗನಿಗೆ ಅವರ ದೈವಸ್ಥಾನದ ಪಕ್ಕದಲ್ಲಿಯೇ ಜಾಗ ನೀಡಲು ಒಪ್ಪಿದ್ದಾರೆ. ಈ ವಿಷಯವನ್ನು ದೈವಜ್ಞರಲ್ಲಿ ಪ್ರಶ್ನಿಸಲಾಗಿ ನಾಗದೇವರ ಅನುಗ್ರಹ ಒದಗಿ ಬಂದಿದ್ದು, ದೈವಸ್ಥಾನದ ಕನ್ಯಾಭಾಗದಲ್ಲಿ ತಾತ್ಕಾಲಿಕ ಕಟ್ಟೆ ನಿರ್ಮಿಸಿ ಚರ ಪ್ರತಿಷ್ಠೆ ಮಾಡುವಂತೆ ತಿಳಿಸಿದ್ದಾರೆ.

ಶ್ರದ್ಧಾಭಕ್ತಿಯಿಂದ ನಡೆದ ಚರಪ್ರತಿಷ್ಠೆ:
ನಾಗಬನ ನಾಶವಾದ ಪರಿಸರದಲ್ಲಿಯೇ ಆರಾಧನೆ ಮುಂದುವರಿಸಲು ಭಕ್ತರು ನಿರ್ಧರಿಸಿದ್ದಾರೆ. ದೈವಜ್ಞರ ಮಾರ್ಗದರ್ಶನದಲ್ಲಿ ಮತ್ತು ಕ್ಷೇತ್ರದ ತಂತ್ರಿಗಳಾದ ಶಂಕರ ಹೊಳ್ಳ ನಾಗತ್ತಿಮಾರ್ ಅವರ ದಿವ್ಯ ಉಪಸ್ಥಿತಿಯಲ್ಲಿ ಮಾರ್ಚ್ 8ರಂದು ಸಮೀಪದ ( ನಾಗಬನ ನಾಶವಾದ ಸ್ಥಳದಿಂದ ಸುಮಾರು 100 ಮೀಟರ್‌ ದೂರದ ದೈವಸ್ಥಾನದ ಆವರಣದೊಳಗಡೆ ) ಪಂಜರ್ಲಿ ಕಲ್ಲುರ್ಟಿ ದೈವಸ್ಥಾನದ ಕನ್ಯಾಭಾಗದಲ್ಲಿ ಶಿಲ್ಪಿಗಳಿಂದ ವಾಸ್ತು ಆಧಾರಿತವಾದ ತಾತ್ಕಾಲಿಕ ಕಟ್ಟೆ ನಿರ್ಮಿಸಿ, ಅಷ್ಟಕುಲ ನಾಗದೇವರು ಹಾಗೂ ರಕ್ತೇಶ್ವರೀ ದೈವದ ಚರಪ್ರತಿಷ್ಠೆಯನ್ನು ಭಕ್ತಿಭಾವದಿಂದ ನೆರವೇರಿಸಲಾಯಿತು.

ನೂತನ ಕಟ್ಟೆಯಲ್ಲಿ ನಾಗಬ್ರಹ್ಮ, ನಾಗರಾಜ, ನಾಗಕನ್ನಿಕೆ ಸೇರಿದಂತೆ ಅಷ್ಟಕುಲ ನಾಗದೇವರು ಮತ್ತು ರಕ್ತೇಶ್ವರೀ ದೈವಗಳಿಗೆ ಪೂಜೆ ಸಲ್ಲಿಸಲಾಯಿತು. “ಮೂಲ ಸಾನಿಧ್ಯದಲ್ಲಿ ಪುನರ್ ಪ್ರತಿಷ್ಠೆಯ ಕಾಲ ಕೂಡಿಬರುವವರೆಗೆ ಇಲ್ಲೇ ವಾರ್ಷಿಕ ಆರಾಧನೆಗಳು ನಡೆಯಲಿವೆ” ಎಂದು ಕುಟುಂಬಸ್ಥರು ಈ ಸಂದರ್ಭದಲ್ಲಿ ಸಂಕಲ್ಪ ಮಾಡಿದರು.