ಬೆಳ್ತಂಗಡಿ: ಧರ್ಮಸ್ಥಳದ ಬಳಿ ಅತ್ಯಾಚಾರಕ್ಕೊಳಗಾಗಿ ಕೊಲೆಯಾದ ಸೌಜನ್ಯಾ ಪ್ರಕರಣಕ್ಕೆ ಸಂಬಂಧಿಸಿದಂತೆ 14 ವರ್ಷಗಳ ನಂತರವೂ ನ್ಯಾಯಕ್ಕಾಗಿ ಹೋರಾಟ ಮುಂದುವರೆದಿದೆ. ಬೆಳ್ತಂಗಡಿಯಲ್ಲಿ ನಡೆದ ‘ನ್ಯಾಯದ ನಡಿಗೆ’ ಸಮಾವೇಶದಲ್ಲಿ ಸೌಜನ್ಯಾ ಪರ ಹೋರಾಟಗಾರ ಮಹೇಶ್ ಶೆಟ್ಟಿ ತಿಮರೋಡಿ ಅವರು ಪೊಲೀಸ್ ಇಲಾಖೆ ಮತ್ತು ರಾಜಕೀಯ ನಾಯಕರ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದು, ಪ್ರಕರಣದ ಹಲವು ಸ್ಫೋಟಕ ಸಂಗತಿಗಳನ್ನು ಜನರ ಮುಂದಿಟ್ಟಿದ್ದಾರೆ.

ಧರ್ಮಸ್ಥಳ ಗ್ರಾಮದಲ್ಲಿ 14 ವರ್ಷಗಳ ಹಿಂದೆ ಅತ್ಯಾಚಾರಕ್ಕೊಳಗಾಗಿ ಕೊಲೆಯಾದ ಸೌಜನ್ಯಾ ಪರ ನ್ಯಾಯಕ್ಕಾಗಿ ಆಗ್ರಹಿಸಿ, ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆ ಮತ್ತು ಪ್ರಜಾಪ್ರಭುತ್ವ ವೇದಿಕೆ ನೇತೃತ್ವದಲ್ಲಿ ಶನಿವಾರ ಬೆಳ್ತಂಗಡಿ ತನಕ ನಡೆದ ‘ನ್ಯಾಯದ ನಡಿಗೆ’ ಮೌನ ಮೆರವಣಿಗೆ ಮತ್ತು ಬೃಹತ್ ಸಮಾವೇಶದಲ್ಲಿ ಹೋರಾಟಗಾರ ಮಹೇಶ್ ಶೆಟ್ಟಿ ತಿಮರೋಡಿ ಆರೋಪಗಳ ಸುರಿಮಳೆಗೈದರು.

ಅಂಬೇಡ್ಕರ್ ಮೈದಾನದಲ್ಲಿ ನಡೆದ ಸಮಾವೇಶವನ್ನು ಸೌಜನ್ಯಾ ತಾಯಿ ಕುಸುಮಾವತಿ ಚಂದಪ್ಪ ಗೌಡ ಉದ್ಘಾಟಿಸಿದರು.

ತಿಮರೋಡಿ ಹೇಳಿಕೆಯ ಪ್ರಮುಖ ಹೈಲೈಟ್ಸ್:

1. ಪೊಲೀಸ್ ಮತ್ತು ರಾಜಕೀಯ ನಾಯಕರಿಗೆ ಅಭಿನಂದನೆಗಳ ವ್ಯಂಗ್ಯ:

“ನಮ್ಮನ್ನು ಈ ಹೋರಾಟಕ್ಕೆ ಪ್ರತಿಸ್ಪರ್ಧಿಗಳ ರೀತಿ ಬಿಂಬಿಸಿದ ಪೊಲೀಸ್ ಇಲಾಖೆ ಮತ್ತು ಅತ್ಯಾಚಾರಿಗಳನ್ನ ರಕ್ಷಣೆ ಮಾಡಿದ ರಾಜಕೀಯ ನಾಯಕರಿಗೆ ಅಭಿನಂದನೆಗಳು. ಎಲ್ಲದಕ್ಕೂ ತಯಾರಾಗಿಯೇ ನಿಂತವರು ನಾವು. 14 ವರ್ಷಗಳ ಹಿಂದೆ ಕಂಡಿದ್ದನ್ನು ಕಂಡ ಹಾಗೆ ಹೇಳಿದ್ದೇನೆ. ದಕ್ಷ ಅಧಿಕಾರಿಗಳಿಗೆ ಇದು ಕಿವಿಮಾತು ಹಾಗೂ ಎಚ್ಚರಿಕೆ.” ರಾಜಕೀಯ ಪಕ್ಷಗಳ ಕೈಗೊಂಬೆಗಳಂತೆ ಕಪಟಿಗಳ ಜೊತೆ ಸೇರಿ ನೀವು ಸಾಕ್ಷಿಗಳನ್ನು ನಾಶ ಮಾಡಿದ್ದೀರಿ ಎಂದು ಅವರು ಆರೋಪಿಸಿದರು.

2. ಸಾಕ್ಷ್ಯ ನಾಶ ಮತ್ತು ಕಾಣೆಯಾದ CCTV ಫುಟೇಜ್:
“ಪೊಲೀಸ್ ಇಲಾಖೆ ಸೌಜನ್ಯ ಪ್ರಕರಣದ ಎಲ್ಲಾ ಸಾಕ್ಷ್ಯಗಳನ್ನು ನಾಶ ಮಾಡಿದೆ. ನನ್ನ ಧಿಕ್ಕಾರ ಇದೆ. ಪೊಲೀಸರು ಇಲ್ಲಿ ಇವತ್ತು ಮಾಡುವ ವಿಡಿಯೋ, ಅವತ್ತು ಮಾಡಬೇಕಿತ್ತು. 2012 ರಲ್ಲಿ ಸೌಜನ್ಯಾ ಅಪಹರಣದ ಎರಡು CCTV ವಿಡಿಯೋ ಫುಟೇಜ್ ಇದೆ ಎಂದು ಆಗಿನ ಎಸ್ಪಿ ಅಭಿಷೇಕ್ ಗೋಯಲ್ ಅವರೇ ಹೇಳಿದ್ದರು. ಆ ಎರಡು ವಿಡಿಯೋಗಳು ಈಗ ಎಲ್ಲಿ ಹೋಗಿವೆ? ಆ ವಿಡಿಯೋದಲ್ಲಿ ಸೌಜನ್ಯಳನ್ನು ಅಪಹರಣ ಮಾಡಿದ ದೃಶ್ಯವೇ ಇದೆ. ಈಗಿನ SIT ಅದನ್ನು ತನಿಖೆ ಮಾಡಬೇಕು” ಎಂದು ಒತ್ತಾಯಿಸಿದರು.

3. ಈಗಿನ SIT ಬಗ್ಗೆ ಅನುಮಾನ – ಸಿಎಂ ಬಳಿ ನ್ಯಾಯದ ಮೊರೆ:
“SIT ಯಲ್ಲಿ ಇರುವ ಅಧಿಕಾರಿಗಳ ಬಗ್ಗೆ ಪೋಷಕರಿಗೆ ಅನುಮಾನವಿದೆ. SIT ಅಧಿಕಾರಿಗಳ ಹತ್ತಿರ ನಾವು ನ್ಯಾಯ ಕೇಳುವುದಿಲ್ಲ. ರಾಜ್ಯದ ಮುಖ್ಯಮಂತ್ರಿ ಹಾಗೂ ಗೃಹ ಮಂತ್ರಿಗಳ ಬಳಿ ನ್ಯಾಯ ಕೇಳುತ್ತೇವೆ. ಮಾಹಿತಿ ಬೇಕಾದರೆ, ಸತ್ಯ ಬೇಕಾದರೆ ನಾವೇ ನೀಡುತ್ತೇವೆ. ಯಾರನ್ನು ತನಿಖೆ ಮಾಡಬೇಕು ಎಂದು ಹೇಳುತ್ತೇವೆ” ಎಂದರು.

4. ಬುರುಡೆ ಗ್ಯಾಂಗ್, ಸುಳ್ಳು ಕೇಸ್ ಮತ್ತು ಗಡಿಪಾರು:
“ನಮ್ಮನ್ನು ಬುರುಡೆ ಗ್ಯಾಂಗ್ ಎಂದು ಬಿಂಬಿಸುವ ಕೆಲಸ ಆಯಿತು. ಚಿನ್ನಯ್ಯನನ್ನು ಹೆದರಿಸಿ ಬೆದರಿಸಿ ಹೇಳಿಕೆ ಬದಲಾಯಿಸಲಾಯಿತು. 13 ಹೊಂಡದಲ್ಲಿ ಹೆಣ ಸಿಗದಾಗ ಅದು ಷಡ್ಯಂತ್ರ ಎಂದರು, ಅದೇ ಹೊಂಡದಲ್ಲಿ ಹೆಣ ಸಿಕ್ಕಿದೆ ಎಂದಾಗ ಕಾರ್ಯಾಚರಣೆ ನಿಲ್ಲಿಸಿದರು. ನನ್ನ ವಿರುದ್ಧ ಸುಳ್ಳು ಕೇಸ್ ಹಾಕಿಸಿ ಗಡಿಪಾರಿಗೆ ಆದೇಶ ಮಾಡಿಸಿದ್ದು ಇಲ್ಲಿಯ ಡಿವೈಎಸ್ಪಿ ವಿಜಯ ಪ್ರಸಾದ್. ನಾನು ಗಡಿಪಾರು ಆಗಿ ವಾಪಸ್ ಬರುವಾಗ ಅದೇ ವ್ಯಕ್ತಿ ಅಮಾನತಾಗಿ ಮನೆಗೆ ಹೋಗಿದ್ದ. ಇದು ಅಣ್ಣಪ್ಪ ಸ್ವಾಮಿ, ಸೌಜನ್ಯಳ ಶಕ್ತಿ!” ಎಂದು ಕಿಡಿಕಾರಿದರು.

5. ತನಿಖಾಧಿಕಾರಿ ಯೋಗೀಶ್ ಬಗ್ಗೆ ಸ್ಫೋಟಕ ಹೇಳಿಕೆ:
“ಸೌಜನ್ಯ ತಾಯಿ ಹೇಳಿದ ಆಧಾರದಲ್ಲಿ ತನಿಖೆ ಮಾಡಿದರೆ ಸತ್ಯ ಹೊರಬರುತ್ತದೆ. ಆಗಿನ ತನಿಖಾಧಿಕಾರಿ ಯೋಗೀಶ್ ನನ್ನ ನೇತು ಹಾಕಿದರೆ ಸತ್ಯ ಹೊರಬರುತ್ತದೆ. ಯೋಗೀಶ್ 5 ಮಂದಿಯನ್ನು ನಾನೇ ಬಚಾವ್ ಮಾಡಿದ್ದು ಎಂದು ದೈವಗಳ ಮುಂದೆ ಪ್ರಮಾಣ ಮಾಡಿ ಹೇಳಿದ್ದಾನೆ. SIT ಮೊದಲು ಯೋಗೀಶನನ್ನು ನೇತಾಕಬೇಕು” ಎಂದು ಆಗ್ರಹಿಸಿದರು.

6. ಸರ್ಕಾರಕ್ಕೆ ಎಚ್ಚರಿಕೆ ಮತ್ತು ಬೇಡಿಕೆ:
“ಧರ್ಮಸ್ಥಳದಲ್ಲಿ ಅತ್ಯಾಚಾರ ಮಾಡುವ ಹೆಗ್ಗಣಗಳನ್ನು ಹಿಡಿಯಿರಿ ಎನ್ನುವುದು ತಪ್ಪಾ? ಸುಪ್ರೀಂ ಕೋರ್ಟ್ ಕೂಡ ಒಂದು ವರ್ಷದ ಹಿಂದೆಯೇ ಪೊಲೀಸರಿಗೆ ಚಾಟಿ ಬೀಸಿದೆ. ಒಂದು ಶಕ್ತಿ ಈ ಹೋರಾಟವನ್ನು ಕಾಪಾಡುತ್ತಿದೆ. ಇದು ಒಂದು ಹೆಣ್ಣಿನ ವಿಷಯವಲ್ಲ, ಇಲ್ಲಿ ಸಾವಿರಾರು ಹೆಣ್ಣು ಮಕ್ಕಳ ಮಾರಣಹೋಮವಾಗಿದೆ. ಈ ಕೈಯಲ್ಲಿ ರಕ್ತ ಅಂಟಿಕೊಳ್ಳಲು ಬಿಡಬೇಡಿ. ಸರ್ಕಾರ ಸೌಜನ್ಯ ಹೆಸರಲ್ಲಿ ಹೆಲ್ಪ್ ಲೈನ್ ಶುರು ಮಾಡಬೇಕು. ಯಾವ ಹೆಣ್ಣಿನ ತಾಯಿಯೂ ಮುಂದೆ ಕಣ್ಣೀರು ಹಾಕಬಾರದು.”

“ಈ ಬಾರಿ ನಮಗೆ ನ್ಯಾಯ ಸಿಗದೇ ಹೋದರೆ, ಮುಂದಿನ ದಿನ ಮಂಗಳೂರಿನ ನೆಹರು ಮೈದಾನದಲ್ಲಿ ಲಕ್ಷಾಂತರ ಜನರನ್ನು ಸೇರಿಸಿ ರಾಜ್ಯಮಟ್ಟದ ಹೋರಾಟ ಮಾಡುತ್ತೇವೆ. ಕೊನೆಯ ಉಸಿರಿನವರೆಗೂ ಹೋರಾಟ ನಡೆಸುತ್ತೇವೆ” ಎಂದು ಗುಡುಗಿದರು.

ಸಮಾವೇಶದಲ್ಲಿ ಕುಸುಮಾವತಿ ಅವರು ಮಾತನಾಡಿ ಇವತ್ತಿನ ದಿನ ನನ್ನ ಮಗಳನ್ನು ಕಳೆದುಕೊಂಡ ದಿನ… “ನ್ಯಾಯಕ್ಕಾಗಿ 14 ವರ್ಷಗಳಿಂದ ಕಾಯುತ್ತಿದ್ದೇವೆ. ಈವರೆಗೆ ಅಧಿಕಾರಿಗಳು ಮಾಡಿದ ತಪ್ಪಿನಿಂದಾಗಿ ನ್ಯಾಯ ಸಿಕ್ಕಿಲ್ಲ, ನಾನು ನ್ಯಾಯ ಸಿಗುವವರೆಗೆ ವಿರಮಿಸುವುದಿಲ್ಲ. ಈ ಬಾರಿಯಾದರೂ ನೂತನವಾಗಿ ನೇಮಕವಾದ ಅಧಿಕಾರಿಗಳು ನನಗೆ ನ್ಯಾಯ ಒದಗಿಸಿಕೊಡಬೇಕು ಎಂದು ವೇದಿಕೆಯಲ್ಲಿ ಸೆರಗೊಡ್ಡಿ ಬೇಡುತ್ತಾ, ಗಳಗಳನೆ ಅತ್ತುಬಿಟ್ಟರು.

ಪ್ರಸ್ತಾವಿಕವಾಗಿ ಮಾತನಾಡಿದ ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆಯ ಅಧ್ಯಕ್ಷರಾದ ಅನಿಲ್‌ ಕುಮಾರ್‌ ಅಂತರ ಈ ಬಾರಿ ಸುಪ್ರೀಂ ಕೋರ್ಟ್‌ ಸುಪರ್ಧಿಯಲ್ಲಿ ನಡೆಯುವ ತನಿಖೆಯ ಮೇಲೆ ಭರವಸೆ ಇಟ್ಟಿದ್ದೇವೆ, ನ್ಯಾಯ ಸಿಕ್ಕಿಲ್ಲ ಎಂದಾದರೆ ತಪ್ಪೆಸಗುವ ತಂಡದ ಪ್ರತಿಯೊಬ್ಬ ಅಧಿಕಾರಿಗಳ ಮನೆ ಮುಂದೆಯೇ ಪ್ರತಿಭಟಿಸಿ ನ್ಯಾಯ ಪಡೆಯುತ್ತೇವೆ ಎಂದರು.

ಇನ್ನೋರ್ವ ಹೋರಾಟಗಾರ ಗಿರೀಶ್‌ ಮಟ್ಟಣ್ಣನವರ್‌ ಮಾತನಾಡುತ್ತಾ, ಇಲ್ಲಿ ಸೇರಿರುವವರೆಲ್ಲ ಧರ್ಮಸ್ಥಳ ಕ್ಷೇತ್ರದ ವಿರೋಧಿಗಳಲ್ಲ ಎಂದು ಹೇಳಿ, ಮಾದ್ಯಮದವರಿಗೆ ತೋರಿಸುತ್ತಾ ಇಲ್ಲಿ ಸೇರಿರುವ ಹೋರಾಟಗಾರರೆಲ್ಲರೂ ಎರಡೂ ಕೈಗಳನ್ನು ಮೇಲೆತ್ತುವ ಮೂಲಕ ನಾವೆಲ್ಲ ಧರ್ಮಸ್ಥಳದ ಕ್ಷೇತ್ರದ ಭಕ್ತರು ಎಂಬುವುದನ್ನು ರುಜುವಾತು ಮಾಡಿಸಿದರು. ನಾವು ಹೋರಾಟಗಾರರು ಲೆಪ್ಟಿಸ್ಟ್‌ಗಳಲ್ಲ, ರೈಟಿಸ್ಟ್‌ಗಳಲ್ಲ ಬದಲಾಗಿ ನಾವು ರೇಪಿಸ್ಟ್‌ಗಳ ವಿರೋಧಿಗಳು ಎಂದರು.

ಹೈಕೋರ್ಟ್ ವಕೀಲರಾದ ಮೋಹಿತ್ ಕುಮಾರ್‌ ಮಾತನಾಡಿ, ಉಜಿರೆಯಿಂದ ಬರುತ್ತಿರುವಾಗ ಪೊಲೀಸಿನವರು ಎಲ್ಲಾ ವಿಡಿಯೋ ಮಾಡುತ್ತಿದ್ದರು. ಉತ್ತಮವಾದ ಕೆಲಸ,ಕಾನೂನು ರೀತಿಯಲ್ಲಿ ಮಾಡಬೇಕಾದದ್ದು,ಮಾಡಿದ್ದೀರಿ.. ಆದರೆ ಅದೇ ವಿಡಿಯೋವನ್ನು 14 ವರ್ಷಗಳ ಹಿಂದೆ ಮಾಡಿರುತ್ತಿದ್ದರೆ ಇಷ್ಟು ಜನ ಹೋರಾಟಗಾರರ ಸಾರ್ವಜನಿಕರ ನೆಮ್ಮದಿಯನ್ನು ಹಾಳು ಮಾಡುತ್ತಿರುವುದು ಇರ್ತಿರಲಿಲ್ಲ ಎಂಬುವುದಾಗಿ ಪೊಲೀಸರ ಪ್ರಥಮ ಲೋಪದ ಬಗ್ಗೆ ಚಾಟಿ ಬೀಸಿದ ವಕೀಲರು ವಿಡಿಯೋ ಮಾಡುವುದು ಬಿಡಿ ರೆಕಾರ್ಡ್‌ ಆದ ವಿಡಿಯೋವನ್ನೂ ಕೂಡಾ ಕಲೆಕ್ಟ್‌ ಮಾಡಲಿಲ್ಲ ನೀವು…ಈ ಎಂಟೈರ್ ಹೋರಾಟಕ್ಕೆ ಹೊಣೆ ಪೊಲೀಸ್‌ ಡಿಪಾರ್ಟ್ಮೆಂಟ್‌ ಎಂದರು.

ಕಾರ್ಯಕ್ರಮದಲ್ಲಿ ಹೋರಾಟಗಾರರಾದ ಪ್ರಸನ್ನ ರವಿ ಮತ್ತು ದೈವಾರಾಧಕ ಮತ್ತು ಧರ್ಮ ಸೇನಾನಿ ತಮ್ಮಣ್ಣ ಶೆಟ್ಟಿ, ಮಾತನಾಡಿ ಇದು ಸತ್ಯ ಧರ್ಮದ ಮೂಲಕ ನ್ಯಾಯ ಪಡೆಯುವ ಹೋರಾಟವಾಗಿದೆ. ಕಾನೂನಿಗೆ ಗೌರವ ನೀಡುತ್ತೇವೆ ಆದರೆ ಈ ಹೋರಾಟದಿಂದ ವಿರಮಿಸುವುದಿಲ್ಲ ಎಂದರು.ನ್ಯಾಯವಾದಿಗಳಾದ ವಾಸು ಪೂಜಾರಿ, ಹೋರಾಟಗಾರ ಜಯಂತ್ ಟಿ, ದಿನೇಶ್ ಗಾಣಿಗ ಸೇರಿದಂತೆ ಹಲವು ಹೋರಾಟಗಾರ ಮುಖಂಡರು ವೇದಿಕೆಯಲ್ಲಿ ಉಪಸ್ಥಿತರಿದ್ದರು.